Global Sumud flotılııasy Antalıa jaǵalaýynan Gazaǵa qaraı jol tartty
ASTANA. KAZINFORM – Gaza sektoryna qoıylǵan blokadany buzyp ótip, anklav turǵyndaryna gýmanıtarlyq kómek jetkizýdi maqsat etken halyqaralyq Global Sumud flotılııasy Túrkııanyń Antalıa jaǵalaýynan saparyn qaıta jalǵastyrdy. Bul týraly Anadolý jazdy.
Flotılııa quramynda 54 keme men 426 belsendi bar. Mıssııaǵa 39 elden qatysýshylar qosylǵan. Qazirgi ýaqytta flotılııa kemeleri Gazadan 340 teńiz mıli qashyqtyqta ornalasqan.
Gaza sektoryna Izraıl qoıǵan blokadany buzyp, anklavqa asa qajet gýmanıtarlyq kómekti jetkizýdi maqsat etken halyqaralyq Global Sumud flotılııasynyń «2026 jyldyń kóktemgi mıssııasy» 29 sáýirge qaraǵan túni Krıt araly jaǵalaýynda Izraıl áskerı kúshteriniń shabýylyna ushyraǵan edi.
Izraıl áskeri Gazadan 600 teńiz mıli qashyqtyqta jáne Grekııanyń aýmaqtyq sýlaryna jaqyn mańda 177 belsendini ustaǵan. Keıin olarǵa kúsh qoldanylǵany habarlandy.
Sondaı-aq Abý Kıshk pen Avıla esimdi belsendilerdi Izraıl ustalǵannan keıin bosatpaı, el aýmaǵyna kúshtep áketkeni jáne tergeý kezinde olarǵa aýyr fızıkalyq azaptaý qoldanylǵany aıtyldy.
Aıta keteıik, keshe Londonda antımıgranttyq jáne Palestınany qoldaý sherýlerine ondaǵan myń adam shyqty.
Sondaı-aq Gazada ana ólimi úsh esege artty.
