Global-2000 tizimine engen 7 ınvestor Qazaqstandaǵy iri jobalarǵa tartyldy
Bul týraly búgin Úkimettiń selektorlyq rejimdegi otyrysynda QR Investıtsııalar jáne damý mınıstri Jeńis Qasymbek málim etti, dep habarlaıdy QazAqparat.
«Memleket basshysynyń tapsyrmasyna sáıkes, QR Indýstrııalyq-ınnovatsııalyq damytýdyń 2015-2019 jyldarǵa arnalǵan memlekettik baǵdarlamasy 2016 jyly ózektendirildi. Baǵdarlamada damýdyń negizgi vektorlary bolyp - eksportqa baǵdarlaný jáne eńbek ónimdiliginiń ósýi belgilendi. Sondaı-aq 2019 jylǵy deńgeıge qaraı 4 nysanaly ındıkator belgilengen. Birinshisi - eńbek ónimdiligin 2015 jylǵa qaraǵanda naqty mánde 22 paıyzǵa ósirý. Ekinshisi - eksporttyń qundyq kólemin 2015 jylǵy deńgeıge qaraǵanda 19 paıyzǵa ósirý. Úshinshisi - óńdeýshi ónerkásiptiń negizgi kapıtalyna 4,5 trln. teńgeni ınvestıtsııalaý. Tórtinshi - energııa syıymdylyǵynyń 2014 jylǵy deńgeıine qaraǵanda, keminde 7 paıyzǵa tómendetý», - dep atap ótti ol.
Mınıstrdiń aıtýynsha, baǵdarlamada 2016 jylǵa deıin 4 negizgi maqsatty ındıkator men 10 nátıjeli kórsetkishke qol jetkizý josparlanǵan. 2016 jyldyń qorytyndysynda josparly mánde 3 maqsatty ındıkator men 8 nátıjeli kórsetkishke qol jetkizilgen.
«Dástúrli sektorlarda tıimdi bazalyq ındýstrııa qurý nátıjesinde elimizdiń 7 óńirinde jalpy quny shamamen 68,7 mlrd. teńgeni quraıtyn qoldanystaǵy óndiristerdi jańǵyrtý jáne keńeıtý boıynsha 10 joba júzege asyryldy. Sala quraýshy iri jobalardy júzege asyrý arqyly ındýstrııalyq ósimniń jańa núktelerin qurý aıasynda jalpy somasy 154,9 mlrd. teńgeni quraıtyn metallýrgııa, munaı óńdeý, mashına jasaý, qurylys ındýstrııasy syndy óńdeý ónerkásibiniń 4 sektorynda 6 jańa iri óndiris quryldy. Sonymen birge iri jobalardy júzege asyrý úshin Global-2000 tizimine engen kompanııalardyń arasynan 7 ınvestor tartyldy»,- dedi Jeńis Qasymbek.
