Glencore Qazaqstandaǵy geologııalyq barlaýǵa $10 mln ınvestıtsııa baǵyttaıdy
ASTANA. QazAqparat - Búgin Londonda QR Investıtsııalar jáne damý vıtse-mınıstri Erlan Haırov jáne «Qazgeologııa» AQ basqarma tóraǵasy Ǵalym Nurjanov álemdegi iri shveıtsarııalyq Glencore kompanııasynyń aktsıoneri, sondaı-aq «Kazzinc Holdings» JShS dırektorlar keńesiniń tóraǵasy Nıkola Popovıchpen kezdesti.
«Qazgeologııa» AQ baspasóz qyzmetiniń habarlaýynsha, taraptar birlesken jobalardy iske asyrý boıynsha josparlardy talqylap, ortaq mámilege keldi. Atap aıtqanda Glencore «Qaztsınk» JShS arqyly 5 boljaldy ýchaskede geologııalyq barlaý júrgizýdi qarjylandyrýǵa ázir. Olar Qazaqstandaǵy óndiristik kompanııalary bar shaǵyn qalalarǵa jaqyn ornalasqan. 2017 jyldan bastap kompanııa atalǵan ýchaskelerde birlesken geologııalyq barlaýdy bastaýǵa ázir. Bastapqy kezeńde ınvestıtsııa kólemi keminde 10 mln AQSh dollary bolady.
«Qazgeologııa» AQ basshylyǵy Rio Tinto-nyń Afrıka-Eýrazııa óńirindegi geologııalyq barlaý operatsııalary dırektory Ken Tentonmen kezdesti. Kezdesýde Qaraǵandy oblysyndaǵy júzege asyrylyp jatqan 2 joba boıynsha ekijaqty yntymaqtastyqtyń ózekti máseleleri talqylandy. Sondaı-aq aldaǵy jyly qazaqstandyq kadrlardy oqytý jáne osy salaǵa ınnovatsııalyq tehnologııalardy transfertteý jaıy da qarastyryldy.
