Gleb Brýsenskıı Argentınadaǵy Olımpıadanyń toptyq jarysynda birinshi keldi

ASTANA. QazAqparat - Qazaqstandyq veloshabandoz Gleb Brýsenskıı Argentınada ótip jatqan jasóspirimder Olımpıadasynda toptyq jarysta birinshi keldi, dep habarlaıdy QazAqparat Ulttyq Olımpıada komıtetiniń baspasóz qyzmetine silteme jasap. 

Ol 63,9 shaqyrymdyq qashyqtyqty 1:30:58 ýaqytymen júrip ótti. Taǵy bir sportshymyz Evgenıı Fedorov 1:31:03 ýaqytymen segizinshi bolyp márege keldi. Osylaısha Gleb 100, Evgenıı 20 upaı enshiledi. 

«Jarys qıyn boldy. Barlyǵy shabýyldaýǵa tyrysty. Biz bar kúshimizdi jumsap, alǵa sýyrylyp shyqqysy kelgenderdi toqtatýǵa umtyldyq. Jarystyń sońyna qaraı Lıýksembýrg jáne Polsha sportshylarymen alǵa shyqtyq. Biraq polshalyq tez sharshap qalyp, Lıýksembýrg shabandozymen jaqsy jumys istep, toptap uzap kettik. Márede men oǵan qaraǵanda jyldam boldym», - dedi Gleb Brýsenskıı.

Evgenıı Fedorov jarys týraly oıyn bildirdi. 

«Aldymen men alǵa sýyrylyp shyqtym. Odan keıin komandalasym Gleb Brýsenskıı sondaı áreket jasady. Al men bolsam, toptyń jyldamdyǵyn báseńdetýge. Ol birinshi bolyp márege jetse, men shamamen altynshy-jetinshi boldym», - dedi Evgenıı Fedorov.  

Veloshabandozdar áli úsh kún jarysady. Solardyń qorytyndysy boıynsha jasóspirimder Olımpıadasynyń jeńimpazdary men júldegerleri belgili bolady.