Ǵ.Qurmanǵalıev atyndaǵy BQO fılarmonııasyna akademııalyq ataǵy berildi
ASTANA. KAZINFORM – QR Úkimetiniń 2025 jylǵy 2 jeltoqsandaǵy № 1032 qaýlysyna sáıkes Ǵ.Qurmanǵalıev atyndaǵy Batys Qazaqstan oblystyq fılarmonııasyna akademııalyq mártebe berildi.
Fılarmonııa dırektory, Qazaqstannyń eńbek sińirgen qaıratkeri Baýyrjan Halıollanyń málim etkenindeı, ótken jyly 1 tamyzda qos mekeme – «Atameken» óner ordasy men fılarmonııa ońtaılandyrý tásilimen qosylyp, qazirgi kezde 300-den astam adam jumys isteıdi.
Baýyrjan Ergenulynyń sózine qaraǵanda, fılarmonııa quramynda Dáýletkereı atyndaǵy qazaq halyq aspaptar orkestri, Sh.Qajyǵalıev atyndaǵy estradalyq-sımfonııalyq orkestri, «Atameken» halyq bıi, folklorlyq, klassıkalyq kameralyq, vokaldyq-kameralyq ansamblderi óz sheberlikterin ushtap keledi. Erekshe atap óter jaıt, «Atameken» erler bı ansambli respýblıkada tuńǵysh ret Batys Qazaqstan oblysynda ashyldy. Biryńǵaı dástúrli ánshiler bólimi de tek osy fılarmonııada qurylǵan.
Sondaı-aq elge tanymal dástúrli ánshilermen qatar klassıkalyq jáne estradalyq týyndylardy oryndaýshylar eńbek etedi.
Bıyl Cheh Respýblıkasynda 56-shy ret uıymdastyrylǵan «Liptálské slavnosti – 2025» halyqaralyq folklor festıvaline Qazaqstan birinshi ret shaqyrtý alyp, qazaq folklorlyq ónerin eýropalyqtarǵa tanystyrý mıssııasy Ǵ.Qurmanǵalıev atyndaǵy Batys Qazaqstan oblystyq fılarmonııasyna buıyrdy. Festıval aıasynda fılarmonııa ártisteri Zlınskıı ólkesiniń Ratıbor, Senınka, Lıptal eldi mekenderinde sahnaǵa shyqty.
Sonymen qatar fılarmonııa ujymy Almaty qalasyndaǵy Respýblıka saraıynda «Aq Jaıyqtan aq sálem!» atty kontsert qoıdy. Jaıyq óńiriniń mańdaıyna bitken birtýar tulǵalar — Juban Moldaǵalıevtiń 105 jyldyǵy, Qadyr Myrza Áliniń 90 jyldyǵy, Eskendir Hasanǵalıevtiń 80 jyldyǵyna arnalǵan keshte jergilikti avtorlardyń shyǵarmashylyǵy da nasıhattaldy.
Oǵan qosa fılarmonııa ártisteri Qyrǵyzstan Respýblıkasynyń Aqbulaq aýylynda eńbek batyry Toqtoǵon Altybasarova atyndaǵy mádenıet úıinde óner kórsetti.
- Akademııalyq mártebeniń berilýi — aldaǵy jyly 60 jyldyǵyn toılaıtyn fılarmonııa úshin úlken abyroı. Bul joǵary ataqqa saı bolý úshin fılarmonııa ujymy aldaǵy ýaqytta da aıanbaı eńbek ete beretin bolady, - dedi B.Halıolla.
Onyń aıtýynsha, aqparat jáne jarnama bólimine qarasty foto-vıdeo stýdııasy iske qosyldy. Atalmysh bólimge qarasty óndiristik tsehy ashyldy. Sheberlik tsehyna jumys barysyn jeńildetetin lazerlik stanok, plotterlik stanok, termo press qurylǵylary satyp alyndy. Bul jańa jabdyqtar shyǵarmashylyq toptyń dızaındaryna jan bitirip, sapaly ári jedel ónim shyǵarýǵa mol múmkindik beredi. Kádesyılar, merekelik marapattar, brendtik ónimder, sahnalyq atrıbýttar — barlyǵy osy sheberhanada daıyndalyp, óndiriledi.
«Atameken» kontsert zalynyń sahnasy da jańa tehnologııamen tolyqtyryldy. Fılarmonııa uıymdastyrǵan sharalarda 3D MAPPING júıesinde jumys isteıtin lazerlik proektor qoldanylatyn bolady.
3D Mapping — bul arnaıy jobalanǵan beıne men naqty obektiniń geometrııasyn sáıkestendirip, olardy «birtutas» etip kórsetetin tehnologııa. Mundaı format kórermenge jańa kórkemdik áser beredi jáne dástúrli dekoratsııalardy vırtýaldy keńistikpen almastyryp, vızýaldyq fon beredi.
2025 jyly Batys Qazaqstan oblysynyń ákimi Narıman Tóreǵalıevtiń qoldaýymen mekemedegi qos orkestrdiń mýzykalyq aspaptary tolyqtaı jańartyldy. Keı aspaptar Eýropa men Amerıkadan jetkizildi.
Mekemege sońǵy úlgidegi 50 oryndyq avtobýs ta satyp alyndy.
Eske sala keteıik, budan buryn Batys Qazaqstanda mádenıet salasynyń úzdikteri marapattalǵanyn jazǵan bolatynbyz.