Ǵızat Nurdáýletov TMD qaýipsizdik keńesi hatshylarynyń kezdesýine qatysty
MÁSKEÝ. QazAqparat - Máskeý qalasynda TMD-ǵa múshe memleketterdiń qaýipsizdik keńesi hatshylarynyń 10-shy kezdesýi ótti. Oǵan Qazaqstan Respýblıkasy Prezıdentiniń Kómekshisi – Qaýipsizdik Keńesiniń hatshysy Ǵızat Nurdáýletov qatysty, dep habarlaıdy Aqorda.
Forýmda TMD keńistigindegi qaýipsizdik pen turaqtylyqtyń zamanaýı syn-qaterleri jaǵdaıyndaǵy ózara is-áreket máseleleri qarastyryldy.
Ǵızat Nurdáýletov áriptesterin Qazaqstannyń óńirlik qaýipsizdiktiń negizgi baǵyttary boıynsha ustanymy jaıynda habardar etti.
Atap aıtqanda, ol ashyq jáne syndarly saıası-dıplomatııalyq dıalog kez kelgen daǵdarystan shyǵýdyń tıimdi ári ońtaıly jalǵyz joly ekenin jetkizdi.
Qazaqstannyń Qaýipsizdik Keńesiniń hatshysy óz baıandamasynda TMD-nyń Ońtústik shekaralaryndaǵy qaýipsizdikti qamtamasyz etý úshin Aýǵanstandaǵy jaǵdaıdy tezirek retteý qajettigine nazar aýdardy.
Іs-shara aıasynda Ǵızat Nurdáýletov Reseı Federatsııasy Qaýipsizdik Keńesiniń hatshysy Nıkolaı Patrýshevpen ekijaqty kezdesý ótkizdi.
Kezdesý nátıjesinde eki eldiń Qaýipsizdik keńesiniń apparattary arasyndaǵy 2023-2024 jyldarǵa arnalǵan yntymaqtastyq josparyna qol qoıyldy.
