Ǵızat Nurdáýletov Máskeýde TMD Qaýipsizdik keńesteri hatshylarynyń kezdesýine qatysty

MÁSKEÝ. KAZINFORM — Máskeýde Táýelsiz Memleketter Dostastyǵyna múshe memleketterdiń Qaýipsizdik keńesteri hatshylarynyń XIII kezdesýi ótti. Іs-sharaǵa Qazaqstan Respýblıkasy Qaýipsizdik Keńesiniń Hatshysy Ǵızat Nurdáýletov qatysty. Bul týraly Aqorda málim etti. 

Jıynda óńirlik qaýipsizdik jaǵdaıy jóninde jan-jaqty pikir almasý boldy. Taraptar TMD aýmaǵyndaǵy syn-qaterler men qaýipterdi jáne oǵan birlesip den qoıý sharalaryn talqylady.

— Qazaqstan Respýblıkasy Qaýipsizdik Keńesiniń Hatshysy áriptesterin elimizdiń negizgi baǵyttar boıynsha ustanymymen tanystyryp, yntymaqtastyqty damytý jóninde birqatar usynysyn jetkizdi. Atap aıtqanda, halyqaralyq terrorıstik jelilerdiń qyzmetin toqtatý, esirtki qylmysyna jáne tsıfrlyq aktıvtermen operatsııalar salalaryndaǵy teris paıdalanýǵa qarsy is-qımyl jónindegi birlesken sharalardy kúsheıtý máseleleri qaraldy, — delingen habarlamada.

Eske sala keteıik, buǵan deıin Qaýipsizdik Keńesiniń hatshysy Ǵızat Nurdáýletov Bishkekte ótken «Ortalyq Azııa – Úndistan» formatynda ulttyq qaýipsizdik jónindegi keńes hatshylary men keńesshileriniń úshinshi kezdesýine qatysqan bolatyn.