Ǵızat Nurdáýletov qaýipsizdik máseleleri jónindegi halyqaralyq forýmǵa qatysty

ASTANA. QazAqparat - 24-25 mamyrda Máskeý oblysynda Qaýipsizdik máselelerine jetekshilik etetin laýazymdy tulǵalardyń XI halyqaralyq kezdesýi ótti. Jıynǵa Qazaqstan Respýblıkasy Prezıdentiniń kómekshisi – Qaýipsizdik Keńesiniń hatshysy Ǵızat Nurdáýletov qatysty, dep habarlaıdy QazAqparat.

Aqordanyń resmı saıtynyń jazýynsha, Reseıdiń Qaýipsizdik keńesi uıymdastyrǵan forýmǵa birqatar eldiń qaýipsizdik keńesiniń, quqyq qorǵaý jáne arnaýly organdarynyń, syrtqy saıası vedomstvolarynyń, sondaı-aq ShYU, UQShU, TMD, EEK, Ortalyq Azııa elderiniń Ekonomıkalyq qaýymdastyǵy sekildi halyqaralyq uıymdardyń 100-den asa ókili jınaldy.

Forýmǵa qatysýshylar plenarlyq otyrysta halyqaralyq ahýalǵa qatysty negizgi úrdister, jahandyq qaýip-qaterler jóninde pikir almasty.

Qazaqstan Qaýipsizdik Keńesiniń hatshysy óz sózinde qazirgi geosaıası jaǵdaıda halyqaralyq turaqtylyqty qamtamasyz etý úshin úılesimdi tásilderdiń mańyzdy ekenin atap ótti.

Bul rette ol 2022 jylǵy qazanda Astanada ótken Azııadaǵy ózara is-qımyl jáne senim sharalary jónindegi keńestiń altynshy sammıtinde memleket basshylary men úkimet jetekshileri Keńesti tolyqqandy halyqaralyq uıymǵa aınaldyrý úderisin bastaǵanyn eske saldy. Bul shara memleketaralyq is-qımyldy barlyq eldiń ulttyq múddesine qurmetpen qaraıtyn teń quqyqty, ashyq ári ózara senimdi dıalogqa beıimdeýge baǵyttalǵan.

Ǵızat Nurdáýletov elimizdiń kıberqaýipsizdigin qamtamasyz etýge, esirtki óndirýge jáne ony taratýǵa qarsy is-áreket tásilderi týraly málimet berip, sý qaýipsizdigin qamtamasyz etý jáne sýdy birlese paıdalanýdyń jańa modelderin ázirleý máselelerine basa nazar aýdardy.

Jıynda jahandyq azyq-túlik qaýipsizdigin qamtamasyz etý problemalary jáne basqa da ózekti máseleler egjeı-tegjeıli talqylandy.

Forým aıasynda Qaýipsizdik Keńesiniń hatshysy Ǵızat Nurdáýletov birqatar sheteldik áriptesimen kezdesip, ekijaqty yntymaqtastyq máselelerin qarastyrdy.