Ǵızat Nurdáýletov Aýǵanstan máseleleri jónindegi jıynǵa qatysty

ASTANA. QazAqparat - Prezıdenttiń kómekshisi – Qaýipsizdik Keńesiniń hatshysy Ǵızat Nurdáýletov Aýǵanstan máseleleri jónindegi aımaqtyq qaýipsizdik dıalogy otyrysyna qatysty, dep habarlaıdy Aqorda.

Máskeýde Aýǵanstan máseleleri boıynsha aımaqtyq qaýipsizdik dıalogynyń besinshi otyrysy ótti. Jıynǵa Qazaqstan Respýblıkasy Prezıdentiniń Kómekshisi – Qaýipsizdik Keńesiniń hatshysy Ǵızat Nurdáýletov qatysty.

Kezdesý barysynda Reseıdiń, Úndistannyń, Irannyń, Qytaıdyń, Qyrǵyzstannyń, Tájikstannyń, Túrikmenstannyń jáne Ózbekstannyń qaýipsizdik keńesteriniń hatshylary men ulttyq qaýipsizdik jónindegi keńesshileri Aýǵanstan tóńiregindegi jaǵdaıdyń ózgerýine qatysty anaǵurlym ózekti máselelerdi talqylady.

Ǵızat Nurdáýletov atalǵan eldegi jaǵdaıdy qalypqa keltirý óńirlik turaqtylyq pen qaýipsizdikti qamtamasyz etýdiń mańyzdy faktorlarynyń biri bolyp qala beretinin atap ótti.

Ekstremızm men terrorızmniń, esirtki jáne qarýdyń zańsyz aınalymynyń, sondaı-aq zańsyz kóshi-qonnyń beleń alýynan týyndaǵan qaterlermen qatar, búkil aımaqtyń azyq-túlik, energetıka jáne kólik qaýipsizdigine Aýǵanstandaǵy ahýaldyń yqpaly kúsheıe tústi.

Qazaqstan Respýblıkasy Qaýipsizdik Keńesiniń hatshysy eldegi áleýmettik-ekonomıkalyq jaǵdaıdy turaqtandyrý úshin gýmanıtarlyq qoldaýdy jandandyrýdyń, ásirese, azyq-túlik qaýipsizdigin qamtamasyz etýdiń mańyzdy ekenin atap ótti.

Sonymen birge Aýǵanstannyń úlesi bar óńirlik ekonomıkalyq jobalardyń júzege asyrylýy beıbitshilik pen qaýipsizdiktiń negizin qalap, atalǵan eldi ıntegratsııalyq ekonomıkalyq protsesterge tartý turǵysynan sheshýshi ról atqarýǵa tıis.

Osy kúni is-sharaǵa qatysqan delegatsııa basshylaryn Reseı Federatsııasynyń Prezıdenti Vladımır Pýtın qabyldady.

Foto: akorda.kz