Gıza pıramıdasynan jasyryn dáliz tabyldy
AMMAN. QazAqparat – Egıpettiń týrızm jáne kóne zattar mınıstrligi uly Gıza pıramıdasynyń negizgi kireberisine jaqyn jerden uzyndyǵy 9 metrlik jasyryn dálizdi tapqanyn málimdedi, dep habarlaıdy QazAqparat tilshisi vedomstvo málimdemesine silteme jasap.
Ejelgi álemniń jeti keremetiniń ishinen jalǵyz saqtalǵan Heops pıramıdasy degen atpen tanymal uly Gıza pıramıdalary týraly jańalyq Scan Pyramids jobasy aıasynda jasaldy. Bul joba boıynsha 2015 jyldan bastap qurylymnyń ishine «úńilýge» múmkindik beretin 3D-modeldeý, endoskop, sondaı-aq ınvazıvti emes ınfraqyzyl termografııa tehnologııasy paıdalanylady.
«Pıramıdany zertteý kezinde uzyndyǵy 9 metr, eni 2,1 metr bolatyn dáliz tabyldy, bul jobanyń jumysy 2015 jyldan beri júrgizilip keledi», - dep habarlady Egıpettiń týrızm jáne kóne zattar mınıstri Ahmed Issa.
«Aıaqtalmaǵan dáliz pıramıdanyń salmaǵyn shamamen 7 metr jerde ornalasqan negizgi kireberistiń aınalasyna nemese basqa, áli ashylmaǵan kameraǵa nemese keńistikke qaıta bólý úshin jasalǵan bolýy múmkin. Biz onyń astynan nemese dálizdiń sońynan áldene taba alamyz ba degen suraqqa jaýap berý úshin skanerleýdi jalǵastyramyz. Pıramıdanyń basqa bóligindegi patsha jerlengen kameranyń ústindegi 5 bólme úlken qurylymnyń salmaǵyn qaıta bólý úshin salynǵan dep esepteledi. Faraonnyń birneshe jerleý kamerasy bar bolýy múmkin. Aldaǵy aılarda bizge dálizdiń artynda ne turǵanyn aıtady», - dedi Egıpet kóne zattar joǵarǵy keńesiniń basshysy Mostafa Vazırı pıramıda aldynda uıymdastyrylǵan baspasóz konferentsııasynda.
Ǵalymdar dálizdiń bar ekenin radar men ýltradybys arqyly tekserdi, keıinirek pıramıda tastaryndaǵy kishkentaı ǵana býyn arqyly 6 mıllımetrlik endoskopty engizip, onyń sýretine qol jetkizdi.
Egıpet tarıhshysy ári arheologi Zakı Havas bul qazirgi zamandaǵy Heops pıramıdasymen baılanysty eń mańyzdy jańalyqtardyń biri ekenin málimdedi.
2017 jyly Scan Pyramids zertteýshileri 19 ǵasyrdan qalǵan alǵashqy iri qurylym – uly pıramıda ishinde keminde 30 metr bolatyn bos keńistik anyqtalǵanyn málimdegen bolatyn.
Uly pıramıda bizdiń zamanymyzǵa deıingi shamamen 2 560 jyldary Hýfý nemese Heops faraon basqarǵan kezderi soǵylǵan. 146 metrlik Uly pıramıda 1889 jyly Parıjdegi Eıfel munarasy soǵylǵanǵa deıin adam qolymen jasalǵan álemdegi eń bıik qurylym boldy.
