Gıtler jaıly jazyp, basy daýǵa qalǵan bas redaktorǵa qatysty sot úkimi shyqty
ALMATY. QazAqparat - Almatyda mamandandyrylǵan aýdanaralyq ákimshilik sotynyń sýdıasy «Juldyzdar otbasy - Ańyz adam» jýrnalynyń redaktory Jarylqap Qalybaıǵa 218400 teńge mólsherinde aıyppul salý týraly sheshim shyǵardy.
Másele «Ańyz adam», «Juldyz Joramal», «Juldyzdar otbasy» jýrnaldarynyń bir sanynyń shyǵarylym derekterinsiz shyqqandyǵynda bolyp otyr. Basylymdardy Almaty qalalyq ishki saıasat basqarmasy sotqa bergen bolatyn.
Bul týraly QazAqparat tilshisine qalalyq sottyń baspasóz hatshysy Qýandyq Eshimet habarlady.
«Sot Jarylqap Qalybaıdy QR Ákimshilik kodeksiniń 350-babynyń 1-tarmaǵy boıynsha (Merzimdi baspa basylymdaryn belgilengen shyǵarylym derekterinsiz shyǵarý, efırde óz ataýyn habarlamaı, sol sııaqty anyq emes ne kórineý jalǵan shyǵarylym derekterimen elektrondyq buqaralyq aqparat quraldarynyń tele- jáne radıobaǵdarlamalarynyń efırge shyǵýy) aıypty dep taýyp, osy bap boıynsha ár iske 20 (jıyrma) aılyq eseptik kórsetkish mólsherinde aıyppul taǵaıyndady. Barlyq ákimshilik is boıynsha aıyppul kólemi 120 (júz jıyrma) aılyq eseptik kórsetkishti, ıaǵnı 218400 teńgeni qurady. Sot úkimi boıynsha basylym tırajy tárkilenbeıtin boldy», - dedi Qýandyq Eshimet.
Esterińizge sala keteıik, «Juldyzdar otbasy - Ańyz Adam» jýrnalynyń ótken aıdaǵy sany fashızmniń kósemi Adolf Gıtlerge arnalǵan edi. Basylymda jarııalanǵan «Gıtler - fashıst emes» atty maqala kópshilik qaýym, ásirese ardagerler arasynda úlken narazylyq týdyrǵan bolatyn.
