Gıtara jarty mıllıon dollarǵa satyldy
ASTANA. QazAqparat - AQSh-ta ótken bássaýdada «Beatles» tobynyń múshesi Djordj Harrısonnyń gıtarasy satyldy. Satyp alýshy mýzykalyq aspap úshin jarty mıllıon dollarǵa jýyq aqsha tóledi, dep jazady «VVS» agenttigi.
Harrıson 1963 jyly Mastersound fırmasy shyǵarǵan bul gıtarada toptyń áıgili bolǵan kezinde oınaǵan. Ol mýzykalyq aspapty 1963 jyldyń jazynda «Barratts» dúkeninde jalǵa aldy, sol kezde óziniń gıtarasyn jóndeýge bergen bolatyn.
Harrısonnyń gıtarasy Nıý-Iorkte ótken eki aptalyq «Hard Rock Cafe» bássaýdasynyń qorytyndylary boıynsha satylǵan eń qymbat zat boldy.
Basqa lottardyń arasynda Elvıs Preslıdiń gastrolderge barǵan avtobýsy, sondaı-aq «rok-n-roll patshasynyń» qoldanysynda bolǵan taǵy 150-den astam zat boldy. Gastroldik avtobýs 270 myń dollarǵa satyldy.
