Gir sportymen aınalysatyn áıel: Eren eńbektiń almaıtyn qamaly joq

- Gir sportymen qalaı aınalysa bastadyńyz?

- Negizinen ózim bala kúnnen beri sportqa jaqynmyn. Jalpy otbasymyzben sportty janymyzǵa serik ettik desem artyq bolmas. Anam - jeńil atletıka nusqaýshysy, týǵan aǵam - bokstan sport sheberi.

Al gir sportymen aınalysa bastaǵanyma 7 jyldaı boldy. Áýel basta ońaıǵa soqqan joq. Sonda da berilmeýge bel sheshtim. Alǵashqy nátıjeler baıqalǵan soń qolymnan keletinine senimim artyp, «Nar táýekel!» dep jarystarǵa da qatysa bastadyq.

- Eń alǵash ret qandaı jarysqa qatystyńyz?

- Shynymdy aıtsam, naqty qaı jyly ekenin umytyp qalyppyn. Áıteýir qalalyq deńgeıde ótken jarys bolatyn. Sol dodada 2 oryn aldym. Osydan keıin birneshe jyl qatarynan oblystyq jáne qalalyq saıystarǵa qatysyp jeńimpaz atandym.

Al osy jyldyń shilde aıynda Shyǵys Qazaqstan oblysy Shúlbi kentinde ótken respýblıkalyq jarysta baq synadym. Oǵan elimizdiń túkpir-túkpirinen myqty sportshylar keldi. Barymdy salyp úzdiksiz jattyǵyp, kúmis medaldy qanjyǵama baıladym.

- Aptasyna neshe kún, qansha saǵattan daıyndyq jasaısyz?

- Apta saıyn 3-4 ret birneshe saǵattan kóbinese túngi ýaqytta dene shynyqtyrý-saýyqtyrý keshenine baryp shuǵyldanamyn. Al jarys taıaǵanda kún saıyn qara terge malynyp daıyndalamyn. Meniń jattyqtyrýshym joq. Gir sportymen aınalysatyndardan aqyl-keńes surap, sol boıynsha daıyndyq jasaımyn. Sebebi bapkerdiń jumys kestesine ıkemdele almaımyn. Úı sharýasy, jumys ornym bar degendeı. Bárine ýaqyt tabýǵa týra keledi.

- Sonyń bárine ýaqytty qaıdan tabasyz sonda?

- Men birinshi kezekte anamyn ǵoı. Kúıeýim ekeýimiz 3 bala tárbıelep otyrmyz. Jan jarym jeke kompanııada júrgizýshi bolyp jumys isteıdi. Eki ul, bir qyzymyz bar. Olardyń sabaǵyn qaratyp, úı sharýasymen aınalysyp, tamaq pisiremin.

Qolymyzda naǵashy ata-apam turady. Ózdiginen júrip-tura almaıtyn olar kóp kútimdi qajet etedi. Onyń ústine kúnkóris qamy úshin jumys ta isteımin. «Kaztsınk» kompanııasy Rıdder ken baıytý kombınaty tehnıkalyq qujattamasynyń mamanymyn.

Balalarymdy zalǵa birge alyp ketetin kezder az emes. Bir túsingenim, adam kóńili qalasa súıikti isine báribir ýaqyt tabady eken. Eren eńbektiń almaıtyn qamaly joq ekendigine kózim jetti.

- Álem chempıonatynan júlde alamyn dep oıladyńyz ba?

- Negizi basynda sol jarysqa barmaımyn dep oıladym. Oryn alamyn degen senimniń joqtyǵynan emes, ýaqyt jetpeı qala ma degen ýaıymnan. Sol kezde joldasym kóp qoldaý bildirip, «baǵyńdy synap kór» dedi. Taǵy da «Nar táýekel!» dedik.

Biraq jol shyǵynyna aqsha jetpedi. Sóıtip, jumystaǵy basshylyqqa hat jazyp, qarjylaı qoldaý kórsetýin suradym. Olar betimdi qaqpaı, 1 mln 800 myń teńge bóldi. Sol úshin kompanııa tizginindegi azamattarǵa myń alǵys!

Sondaı-aq demeýshilik tanytqan Rıdder qalasyndaǵy Alekseı Boboshko esimdi kásipkerge de rahmet aıtqym keledi. Kúıeýim jumystan suranyp, bir apta boıy úıde boldy. Osy jandar bolmaǵanda jarysqa qatysa almas edim.

Vengrııanyń astanasy Býdapesht qalasynda jer jahannyń jan jaǵynan kil júırikter jınalypty. 58 kelige deıingi salmaqtaǵy eki kategorııada, atap aıtqanda áýesqoılar men ardagerler sanatynda dodaǵa tústim. 16 kelilik girdi 10 mınýtta 160 ret julqa kóterdim.

Osylaısha, eki kúmis medal ıelendim. Qýanyshymda shek bolmady! Qanshama ýaqyt, mol eńbek pen aşy ter zaıa ketpedi. Rıdderge qaıta oralǵanda otbasym, áriptesterim, kórshi-qolań qushaq jaıa qarsy aldy. Ata-apam kózderine jas alyp, rızashylyǵyn bildirdi.

- Áıel adamǵa únemi gir kóterý ońaı emes shyǵar?

- Árıne. Sporttyń bul túri – aýyr temirdi jaı ǵana kóterý emes, onyń ózindik qyr-syry, tehnıkasy bar. Áıel adamǵa mundaı fızıkalyq jattyǵýlar qıynǵa soǵady. Salmaǵy aýyr jandarǵa sál ońaılaý bolýy múmkin.

Al men sııaqty jeńil salmaqtaǵy áıelderge óte kúrdeli. Tamyrlarym shyǵyp, etim isip, qolymnyń býyndary syrqyraıdy. Biraq jetistikke jetý úshin sonyń bárine shydaýǵa týra keledi.

- Áńgimeńizge kóp rahmet!