Gıpertonýs, bala tiliniń kesh shyǵýy: osteopatııa medıtsınada moıyndalǵan ba
ASTANA. KAZINFORM – Balalardaǵy gıpertonýs, sóıleýiniń kesheýildeýi men bosaný jaraqatynyń saldaryn osteopatııa arqyly emdeýge bola ma? Bul saýalǵa QR Densaýlyq saqtaý mınıstrligi Medıtsınalyq jáne farmatsevtıkalyq baqylaý komıteti tóraǵasynyń orynbasary Jandos Ádilhan jaýap berdi.
Kazinform tilshisi mınıstrlikten osteopatııanyń atalǵan jaǵdaılardy emdeýdegi tıimdiligi ǵylymı dáleldengen medıtsınalyq ádis retinde moıyndala ma jáne bul baǵytta qandaı klınıkalyq usynymdar qoldanylatynyn surady.
– Mınıstrlik osteopatııalyq qyzmettiń náresteler men balalardaǵy gıpertonýs, plagıotsefalııa, sóıleý damýynyń kesheýildeýi, bosaný jaraqatynyń saldary sııaqty jaǵdaılardy emdeýdegi tıimdiligin ǵylymı dáleldengen medıtsınalyq ádis retinde moıyndamaıdy. Sondaı-aq ony qaýipsizdigi dáleldengen derbes medıtsınalyq ádis dep eseptemeıdi. Balalarǵa medıtsınalyq kómek kórsetý kezinde dáleldi medıtsına prıntsıpterine negizdelgen klınıkalyq hattamalar men usynymdar qoldanylady, - dedi Jandos Ádilhan.
Sonymen qosa ol Qazaqstanda osteopatııanyń tıimdiligi men qaýipsizdigine memlekettik baǵalaý júrgizilgen-júrgizilmegenin túsindirdi.
– Osteopatııa medıtsınalyq mamandyqtar júıesine kirmeıtindikten, mınıstrlikte onyń tıimdiligi men qaýipsizdigin rastaıtyn memlekettik baǵalaý júrgizilgeni týraly málimet joq. Budan bólek, joǵary oqý ornynan keıingi medıtsınalyq bilim berý júıesinde osteopatııa boıynsha biliktilikti arttyrý baǵdarlamalary qarastyrylmaǵan, - delingen jaýapta.
