Gınnestiń rekordtar kitabyna enýi múmkin «Ábý-Dabı Plaza» jaıynda ne bilemiz

ASTANA. QazAqparat - Qurylys salasynyń mamandary «Ábý-Dabı Plaza» kesheni Gınnestiń rekordtar kitabyna kirýi múmkin ekenin aıtýda. Bul nysan Astananyń kórkin keltiretin kórkem sáýletti keshen ekeni sózsiz. Sondyqtan ol óte mańyzdy iri jobalardyń sanatyna jatqyzylǵandyqtan, Astana kúnine oraı elordada boı kóterip jatqan osy aýqymdy ári iri nysan jaıynda aqparatty kópshilik nazaryna usynýdy jón kórdik.

Atap aıtqanda, búginde Astanadaǵy «Ábý-Dabı Plaza» kópfýnktsıonaldy kesheni Qazaqstan men Birikken Arab Ámirlikteri arasyndaǵy kelisimniń negizinde salynyp jatyr. Qazirgi kezde keshen aýmaǵyndaǵy birqatar nysandardyń qurylysy márege jetse de, sonyń ishindegi eń bıik ǵımarattyń qurylysy jalǵasýda. Ol Qazaqstanda ǵana emes, Ortalyq Azııa boıynsha da eń bıik qurylys nysany bolmaq. Budan buryn habarlanǵandaı jalpy jobanyń quny - 1,6 mlrd AQSh dollary.

Keshen qurylysy 2011 jyldyń naýryzynda bastalyp, boljam boıynsha 2018 jyldyń jeltoqsanynda tolyq paıdalanýǵa beriledi dep kútilýde.  «Ábý-Dabı Plaza» kesheni túrli maqsattaǵy bloktardan turady, olardyń barlyǵy birge kópfýnktsıonaldyq bıik ǵımaratty quraıdy. Atap aıtqanda, onda keńseler, qonaq úı, turǵyn úı kesheni bar. Qurylystyń jalpy aýdany 500 myń sharshy metrge jýyq.

Buǵan deıin «Aldar» kompanııasy Dırektorlar keńesiniń tóraǵasy Abýbaker Seddık el Hýrı «Ábý-Dabı Plaza» kesheni Gınnestiń rekordtar kitabyna kirýi múmkin ekenin málim etken bolatyn.

 

«Bul «Báıterektiń» kórinisi ashylyp turatyn kópbeıindi keshen bolady. Ǵımarttyń bıiktigi 320 metrdi quraıdy. Negizi, bul tolyq bıiktigi emes. Bálkim búkil Ortalyq Azııa boıynsha Gınnestiń rekordtar kitabyna kirip qalarmyz. Munda Birikken Arab Ámirligindegi nysandar qurylysynda paıdalanatyn barlyq jańashyldyqtar qoldanylady», - dedi ol.

Bıiktigi 75 qabatty quraıtyn «R» blogynda 106 myń sharshy metrdi quraıtyn 446 páter bolady. Al 29 qabatty «O» blogynyń jalpy aýmaǵy - 68 myń sharshy metr. Qonaqúı men qyzmet kórsetý oryndaryna arnalǵan «N» blogynyń bıiktigi nebári 14 qabatty quraıdy, jalpy aýmaǵy - 32 myń sharshy metr. 30 qabatty «Y» blogynda tek keńseler ǵana ornalasady. Onyń jalpy aýmaǵy - 64 myń sharshy metr.

Negizinen turǵyn úılerge arnalǵan 16 qabatty «Z» blogynda jalpy aýmaǵy 20400 sharshy metrdi quraıtyn 122 páter bolady.

Qazirgi ýaqytta keshende 3 qurylys kompanııasy jumys istep jatyr. onyń biri 2013 jyldyń maýsymynda anyqtalǵan qurylys kesheniniń jańa bas merdigeri - «Arabtec» jáne «Consolidated Contractors Group» kompanııalarynan qurylǵan birikke kásipkerlik. Tirkelgen ataýy -  Arabtec Consolidated Contractors Limited kompanııasynyń fılıaly.

Foto: archi.ru