Gınekologııa salasynyń bilikti mamandary Shardarada bas qosty
TÚRKІSTAN. QazAqparat - Túrkistan oblysyn, Shardara aýdanynda «Tıimdi perınataldy tehnologııalar» atty respýblıkalyq ǵylymı - tájirıbelik konferentsııa ótti, dep habarlaıdy QazAqparat tilshisi.
Densaýlyq saqtaý mınıstrligi men óńirlik Densaýlyq saqtaý basqarmasynyń uıymdastyrýymen ótken basqosýǵa Nur - Sultan, Almaty, Qyzylorda qalalary men Soltústik Qazaqstan, Batys Qazaqstan, Shyǵys Qazaqstan oblystarynan kelgen 100- ge jýyq gınekologııa salasynyń bilikti mamany qatysty
Semınar barysynda Densaýlyq saqtaý mınıstrliginiń «Ana men bala densaýlyǵyn saqtaý» basqarmasynyń bas sarapshysy Janar Sadýova men Almaty qalasyndaǵy Akýsherlik, gınekologııa jáne perınatologııa ǵylymı ortalyǵynyń dırektory Dınara Mırzahmetova bastaǵan top dárigerlerimen birlesip ana men nárestelerdiń dansaýlyǵyn nyǵaıtý, olardyń arasynda ólim-jitimdi azaıtý máselelerin sóz etti. Osy maqsatta tıimdi perınataldy tehnologııalardy engizýge qoldaý kórsetý men júkti áıelderge antenataldy kómek berý baǵytynda tájirıbe almasty.
Jıynda Dúnıejúzilik densaýlyq saqtaý uıymy usynǵan halyqaralyq tehnologııalardyń dáleldi medıtsınasyna negizdelgen tıimdi perınataldy kútim, sábıdiń týa bitken kemistikterin ýaqytyly anyqtaý úshin genetıkalyq jáne ýltradybystyq skrınıng jasaý sekildi mańyzdy máseleler ortaǵa salyndy.
«Respýblıkalyq jıynnyń nátıjesi barlyǵymyz úshin tıimdi bolary sózsiz. Joǵary deńgeıli medıtsına uıymdary mamandarynyń shalǵaıdaǵy Shardara aýdanynda bas qosyp, osy jerde bilimin jetildirýi osyǵan deıin bolmaǵan jaıt. Biz úshin bul qýanyshty sát, maqtanarlyq jaǵdaı. Dál osy Shardara aýdanynda sońǵy 4 jylda birde bir ana ólimi bolmaǵan. Bul bizdiń mamandardyń úlken jetistigi»,- dedi Túrkistan oblystyq Densaýlyq saqtaý basqarmasynyń basshysy Muqan Egizbaev.
Aıta keteıik, atalǵan óńirde jyl saıyn 50 myńnan astam sábı dúnıege keledi. Bul elimizdegi jalpy kórsetkishtiń besten bir bóligin quraıdy. Al, ana men sábı densaýlyǵy elimizdiń demografııalyq, ekonomıkalyq, eńbek, áleýmettik, mádenı jáne qorǵanys áleýetiniń negizin qalyptastyrady. Sondyqtan da, ana men bala densaýlyǵyn qorǵaý - respýblıkadaǵy densaýlyq saqtaý júıesiniń basym baǵyttarynyń biri sanalady.
