Gımnast Asan Salımov Mysyrdaǵy álem kýbogynyń kúmis júldegeri atandy
ASTANA. KAZINFORM — Búgin Mysyr astanasy Kaırde sporttyq gımnastıkadan álem kýbogynyń sheshýshi jarys kúni ótip jatyr, dep habarlaıdy QR Týrızm jáne sport mınıstrligi Sportty damytý dırektsııasynyń baspasóz qyzmeti.
Ulttyq qurama sportshysy Asan Salımov tirenip sekirý jattyǵýynda fınalda baq synap, kúmis medal jeńip aldy. Otandasymyz aqtyq saıysta 14.083 upaı ıelendi.
Júldegerler:
1. Artýr Davtıan (Armenııa) — 14.666 ball
2. Asan Salımov (Qazaqstan)
3. Ionas Danek (Chehııa) 14.016 upaı
Osy dıstsıplınada taǵy bir otandasymyz Altynhan Temirbek úzdik bestikke kirdi.
Bul Kırde Qazaqstan quramasynyń qorjynyna túsken 3-júlde. Keshe tutqaly at snarıadyndaǵy fınalda Zeınolla Ydrysov kúmis, Parıj Olımpıadasynyń kúmis júldegeri Narıman Kýrbanov qola medal ıelengen.
Budan buryn 16 jastaǵy qazaqstandyq tennısshi Aljırdegi jarysta chempıon atanǵanyn jazǵanbyz.
