Gımnast Aqmaral Erekesheva Grekııadaǵy týrnırde top jardy

ASTANA. KAZINFORM – Kórkem gımnastıkadan Qazaqstan quramasynyń ókili Aqmaral Erekesheva Afınada (Grekııa) ótip jatqan Aphrodite Cup týrnıriniń jeńimpazy atandy.

Otandasymyz kópsaıys qorytyndysy boıynsha altyn medal jeńip aldy. Ulttyq olımpıadalyq komıtettiń málimetinshe, Erekesheva jalpy esepte 109,700 upaı jınady.

Ekinshi oryndy Rýmynııa sportshysy Andrea Verdes ıelendi - 104,250 upaı. Al úzdik úshtikti Bolgarııa ókili Dara Stoıanova túıindedi - 103,450 upaı.

Eske sala keteıik, buǵan deıin sporttyq gımnastıkadan Qazaqstan quramasy álem kýbogyn bir medalmen aıaqtaǵanyn jazǵan edik.