Gımnast Aqmaral Erekesheva Germanııadaǵy álem chempıonatynda úsh fınalǵa joldama aldy
ASTANA. KAZINFORM — Germanııanyń Frankfýrt-na-Maıne qalasynda kórkem gımnastıkadan ótip jatqan álem chempıonatynda irikteý kezeńi aıaqtaldy.
Іrikteý qorytyndysy boıynsha eresekter arasyndaǵy álem chempıonatynda alǵash ret baq synaǵan Qazaqstan quramasynyń ókili Aqmaral Erekesheva úsh fınalǵa joldama aldy.
Jekeleı kópsaıysta gımnastardyń eń úzdik úsh nátıjesi esepke alyndy. Erekesheva 84,200 upaı jınap, segizinshi orynmen fınalǵa ótti. Sheshýshi kezeńge barlyǵy 18 sportshy irikteldi.
Sonymen qatar qazaqstandyq gımnast jekeleı jattyǵý túrlerinde de medal úshin talasady. Aqmaral urshyqtarmen oryndalatyn jattyǵýda 29,000 upaı jınap, tórtinshi nátıje kórsetti. Taspamen oryndalatyn jattyǵýda da 28,350 upaı alyp, tórtinshi orynǵa ıe boldy. Ár jattyǵý túri boıynsha fınalǵa segiz sportshydan ótti.
Qazaqstannyń taǵy bir ókili Aıbota Ertaıqyzy irikteý kezeńinen óte almady. Kópsaıysta ol 24-orynǵa turaqtady. Jekeleı jattyǵý túrlerinde Aıbota shyǵyrshyqpen oryndalatyn jattyǵýda 10-oryn, doppen 33-oryn, urshyqtarmen 15-oryn jáne taspamen 32-oryn aldy.
Aıta keteıik, álem chempıonatynyń fınaldyq kezeńi 14 tamyzda bastalady.
Eske salaıyq, buǵan deıin qazaqstandyq balýandar Germanııadaǵy Gran-prı týrnırinde baq synaıtynyn jazǵanbyz.
