Ǵımaratty jalǵa alyp júrgen aqtóbelik dárigerler jańa ambýlatorııaǵa qonystandy
AQTÓBE. QazAqparat - Aqtóbe oblysy Alǵa aýdany Bestamaq aýylynda dárigerlik ambýlatorııa paıdalanýǵa berildi, dep habarlaıdy QazAqparat tilshisi.
Bestamaq aýylynda 4 myńnan astam adam turady. Aqtóbe qalasynyń irgesindegi aýyl halqy buǵan deıin beıimdelmegen ǵımaratta otyratyn dárigerlerge qaraldy.
«Jańa dárigerlik ambýlatorııa kúnine 50 naýqasty qabyldaı alady. Kúndizgi statsıonarda da em júrgizýge bolady. Buryn beıimdelgen ǵımaratty jalǵa alyp, naýqastarǵa medıtsınalyq kómek kórsetti. Al endi 2 dáriger, 8 orta býyn qyzmetkeri jumys isteıdi»,- dedi Aqtóbe oblystyq densaýlyq saqtaý basqarmasynyń basshysy Áset Qalıev. Memlekettik-jekeshelik seriktestik aıasynda salynǵan ambýlatorııa qurylysyna 73 mıllıon teńge bólindi. Jekeniń qolyndaǵy ǵımaratta otyrǵan dárigerler páter jaldap, ot jaqqan kúnderin eske aldy.
«Salqyn, yńǵaısyz jerde halyqqa kómek kórsetip, medıtsınalyq járdem bergen kúnderimiz boldy. Keı kezde jekeniń qolyndaǵy ǵımarattan qýyp shyǵamyz dep qorqytatyn edi. Ot ta jaqtyq. Biraq bári artta qaldy. Men 20 jyldan astam ýaqyt jumys istep júrmin. Aýyldyń ár adamyn tanımyn. Sońǵy jyldary qan qysymynyń kóterilýi, júrek-qan tamyrlary aýrýlary jıi tirkelip júr. Jańa ǵımarat, zamanaýı qural-jabdyqtar emdi kúsheıtýge septigin tıgizedi»,- dedi jalpy tájirıbeli dáriger Rysjan Balymbetov.
