Ǵımarattyń seısmıkalyq tózimdiligin qalaı bilýge bolady
ASTANA. KAZINFORM — Qazaq qurylys jáne sáýlet ǵylymı-zertteý jáne jobalaý ınstıtýty resmı saýalymyzǵa joldaǵan jaýabynda seısmıkalyq aımaqtardaǵy nysandardyń zilzalaǵa tótep berý deńgeıi qalaı anyqtalatynyn málimdedi.
Instıtýt málimetinshe, aýmaqtyń seısmıkalyq qaýiptiligi seısmıkalyq, ınjenerlik-geologııalyq jáne gıdrogeologııalyq jaǵdaılardyń jıyntyǵy boıynsha aıqyndalady.
– Ony baǵalaý kezinde yqtımal seısmıkalyq áserlerdiń qarqyndylyǵy, topyraqtardyń sıpattamalary men qasıetteri, aýmaqtyń geomorfologııalyq erekshelikteri, jer bederi, jerasty sýlarynyń deńgeıi men ornalasý jaǵdaılary, sondaı-aq ǵımarattar men qurylystarǵa seısmıkalyq áser etý sıpatyna yqpal etýi múmkin ózge de faktorlar eskeriledi. Osyǵan baılanysty naqty ýchaskeniń seısmıkalyq qaýiptilik dárejesin tek onda ornalasqan ǵımarattardyń sapasy nemese tehnıkalyq jaı-kúıi negizinde anyqtaý múmkin emes jáne qurylys aýmaǵynyń tikeleı sıpattamalaryn eskerýdi talap etedi, – delingen habarlamada.
Sonymen qatar, Qazaq qurylys jáne sáýlet ǵylymı-zertteý jáne jobalaý ınstıtýty úıdiń nemese ákimshilik nysandardyń seısmıkalyq tózimdiligin qalaı bilýge bolatynyn túsindirdi.
– Naqty ǵımarat týraly, onyń ishinde jobalaý sheshimderi, saraptamadan ótýi, obektini paıdalanýǵa qabyldaý jáne onyń paıdalaný kezindegi jaı-kúıi týraly resmı málimetterdi alý úshin azamattar tıisti qujattamasy bar memlekettik organdarǵa, jergilikti atqarýshy organdarǵa, menshik ıeleri men paıdalanýshy uıymdarǵa júginýi qajet, – delingen resmı jaýapta.
Aıta keteıik, buǵan deıin Almatyda Qazaqstan - Qytaı jer silkinisin zertteý ortalyǵy ashylǵanyn jazǵanbyz.
