Ǵımarattardy ashyq avtoturaqtarmen qamtýdyń biryńǵaı normalary qajet
ASTANA. QazAqparat - Qoǵamdyq qoldanystaǵy ǵımarattardy ashyq avtokólik turaqtarymen qamtamasyz etýdiń biryńǵaı normalary ázirlense ıgi. Búgin Májilistiń jalpy otyrysynda depýtat Talǵat Erǵalıev Ulttyq ekonomıka mınıstri Erbolat Dosaevtyń atyna joldaǵan saýalynda osy máseleni kóterdi.
Depýtattyń aıtýynsha, ashyq avtoturaq máselesi qazaqstandyqtar úshin, sonyń ishinde Astana men Almaty qalalarynda ózekti bolyp tabylady. Al Іshki ister mınıstrliginiń derekterine sáıkes, sońǵy 11 jylda respýblıka aýmaǵynda tirkelgen avtokólikter sany 3 eseden astam ósken. Astanadaǵy avtokólikter parki 5 eselengen. Osylaı bola tura, elimizdegi qalalardyń basym bóligindegi avtoturaqtar Keńes odaǵy kezinde salynǵan.
«Astana, Almaty jáne respýblıkanyń basqa qalalarynda ashyq avtoturaq oryndarynyń jetispeýshiligi ákimshilik, iskerlik, saýda ortalyqtarynda, sondaı-aq memlekettik mekemeler, mektepter, balabaqshalar, ulttyq kompanııalar keńseleriniń janynda ásirese ózekti máselege aınalyp otyr. Osyǵan baılanysty qoǵamdyq qoldanystaǵy ǵımarattardy ashyq avtokólik turaqtarymen qamtamasyz etý normalaryn qabyldaýdy usynamyz», - dedi depýtat.
