Ǵımarattardyń qoljetimdiligi: kim tekseredi, ne eskeriledi
ASTANA. KAZINFORM – Nysannyń qoljetimdiligin teksergende pandýs pen tutqanyń bar-joǵyna ǵana emes, adamnyń ǵımaratqa qaýipsiz kirip, ishinde erkin qozǵalýyna jáne qajetti qyzmetterdi paıdalana alýyna da mán beriledi.
2026 jyldyń 1 qazandaǵy málimet boıynsha Eńbek jáne halyqty áleýmettik qorǵaý mınıstrliginiń aýmaqtyq departamentterine paıdalanýǵa beriletin qurylys nysandarynyń múgedektigi bar adamdar men júrip-turýy qıyn azamattarǵa qoljetimdiligin rastaý úshin 562 ótinish túsken. Onyń 147-si boıynsha sáıkestik deklaratsııasy kelisilgen. Bul – barlyq ótinishtiń 26%-y. Al 259 ótinishke, ıaǵnı 46%-yna kelisim berilmegen. Qalǵan ótinishter áli qaralyp jatyr.
Kelisim berilmeýiniń negizgi sebepteriniń biri nysandardyń qurylys normalary men erejelerinde belgilengen qoljetimdilik talaptaryna sáıkes kelmeýi. Mysaly, keıbir pandýstarda tutqalar joq nemese olar durys ornatylmaǵan. Sondaı-aq ǵımarattardyń da esikteri tar. Mundaı kemshilikter azamattardyń ǵımaratqa qaýipsiz kirip-shyǵýyna jáne ishinde erkin qozǵalýyna kedergi keltiredi.
Sonymen qatar ótinishterdiń bir bóligi deklaratsııany qoljetimdilik talaptary boıynsha kelisý mindetti emes nysandarǵa da qatysty túsken.
Bıyl 1 shildeden bastap Eńbek jáne halyqty áleýmettik qorǵaý mınıstrliginiń Halyqty áleýmettik qorǵaý salasyndaǵy retteý jáne baqylaý komıtetiniń aýmaqtyq departamentteri qurylys nysandarynyń múgedektigi bar adamdar men júrip-turýy qıyn azamattarǵa qoljetimdiligin zerdeleıdi. Sondaı-aq nysannyń talaptarǵa sáıkestigi týraly deklaratsııalardy kelisedi. Atalǵan mindet Qazaqstan Respýblıkasynyń Qurylys kodeksi kúshine enýine baılanysty engizildi.
Deklaratsııany qaraý kezinde aýmaqtyq departamentter azamattardyń ǵımaratqa kirip-shyǵýyna jáne onyń ishinde qozǵalýyna qajetti jaǵdaılardyń jasalǵanyn tekseredi. Bul rette olardyń kelisimi tek nysannyń qoljetimdilik talaptaryna sáıkestigine qatysty beriledi. Al qurylys-montaj jumystarynyń sapasyna, olardyń jobaǵa sáıkestigine jáne nysandy paıdalanýǵa qabyldaýǵa tapsyrys berýshi, merdiger jáne qurylystyń basqa da qatysýshylary óz quzyreti sheginde jaýap beredi.
Nysannyń qoljetimdiligin teksergende pandýs pen tutqanyń bar-joǵyna ǵana emes, adamnyń ǵımaratqa qaýipsiz kirip, ishinde erkin qozǵalýyna jáne qajetti qyzmetterdi paıdalana alýyna da mán beriledi. Atap aıtqanda, kireberis pen júrip-turý joldarynyń qoljetimdiligi, pandýstardyń, tutqalar men esik oıyqtarynyń belgilengen talaptarǵa saı bolýy, sondaı-aq sanıtarlyq bólmelerdiń qoljetimdiligi de bar. Budan bólek, ǵımaratta qajetti aqparattyq belgiler men kórý, sıpap sezý arqyly baǵyt-baǵdar alýǵa kómektesetin quraldardyń bar-joǵyna nazar aýdarylady. Arba qoldanatyn, kórý jáne estý qabileti buzylǵan adamdardyń qajettilikteri de eskeriledi.
Ǵımarattardyń qoljetimdi bolýy tek múgedektigi bar adamdar úshin ǵana emes, aǵa býyn ókilderine, ýaqytsha júrip-turýy qıyndaǵan azamattar men balalar arbasyn paıdalanatyn ata-analar úshin de mańyzdy. Sondyqtan basty maqsat ár adamnyń ǵımaratqa qaýipsiz kirip, qajetti qyzmetterdi esh kedergisiz paıdalanýyna jaǵdaı jasaý.
Mınıstrlik qurylys nysandaryn paıdalanýǵa bermes buryn qoljetimdilikke qatysty kemshilikterdiń aldyn alýǵa basa nazar aýdarady. Bul jumys azamattardyń ǵımarattar men qajetti ınfraqurylymdy kedergisiz paıdalanýyna jaǵdaı jasaýǵa baǵyttalǵan.
Aıta ketelik turǵyn úılerdiń ishindegi kommertsııalyq nysandarǵa talaptar kúsheıtilmek.
