Ǵımarattan qashyp shyqtyq – Ystanbulda júrgen otandasymyz jer silkinisi jaıly

YSTANBUL. KAZINFORM — Ystanbulda júrgen Abaı esimdi otandasymyz jer silkinisi oryn alǵanda qorqynyshty bolǵanyn aıtady.

— Saýda úıinde júr edik, 6,2 ball jer silkinisi bolyp, ǵımarat dirildep ketti. Júrgen jurttyń bári japatarmaǵaı dalaǵa umtyldy. Endi dalada júrmiz, — deıdi Abaı.

Túrkııanyń tótenshe jaǵdaılar jáne tabıǵı apattar basqarmasynyń saıtynda jarııalanǵan aqparatqa qaraǵanda, Sılıvrı jaǵalaýynda qýaty 6,2 ball jer silkinisi tirkelgen. 

Sılıvrı — Túrkııanyń eýropalyq bóligindegi Mármár teńiziniń jaǵalaýynda ornalasqan qala jáne Ystanbul ólkesiniń aýdany. Jer silkinisiniń 6,92 shaqyrym tereńdikte oryn alǵany naqtylanyp otyr. 

Áleýmettik jelide eldiń Іshki ister mınıstri Alı Erlıkaıanyń málimdemesi tarady.

Onda: «Qýaty 6,2 ball bolatyn jer silkinisi Sılıvrıde, Mármár teńizinde, Ystanbulda oryn aldy. Kórshi ólkelerde de sezilgen jer silkinisine oraı AFAD jáne bizdiń tıisti mekemelerimizdiń barlyq komandasy dalalyq skanerleýdi bastady. Jer silkinisinen zardap shekken azamattarymyzdyń tezirek saýyǵyp ketýin tileımin. Alla elimizdi jáne halqymyzdy apattan saqtasyn», — delingen.

Buǵan deıin Egeı teńizinde jer silkinisiniń jıileýi Túrkııa men Grekııaǵa qater tóndiretini habarlanǵan.