«Ǵımaratta bomba»: Óskemenniń birneshe mektebinen oqýshylar taǵy evakýatsııalanýda

ÓSKEMEN. QazAqparat – Óskemen qalasynda osy aptada úshinshi ret mektep ǵımarattaryna bomba qoıylǵany týraly habar túsip, tekserý júrgizilip jatyr, dep habarlaıdy QazAqparat tilshisi.

ShQO Polıtsııa departamenti baspasóz qyzmetiniń málimetine súıensek, 10 aqpanda túski ýaqytta polıtsııaǵa Óskemendegi birneshe mektepke jarylǵysh zat qoıylǵany týraly habar tústi. Oqıǵa ornyna shuǵyl jetken mamandandyrylǵan qyzmetter bilim ordalarynyń ujymy men oqýshylardy evakýatsııalady.

«Qazirgi ýaqytta ár mektep ishi tekserilip jatyr. Halyqtan sabyrlyq tanytyp, engizilgen shekteýlerge túsinistikpen qaraýdy suraımyz», - delingen aqparatta.

Aıta keteıik, bul osy apta ishinde mektepke bomba qoıylǵany týraly habar túsken úshinshi jaǵdaı. Eń birinshi, 6 aqpanda Óskemende sot jáne mektep ǵımaratyna bomba qoıylǵany týraly habarlandy. Tekserý barysynda eshqandaı jarylǵysh zat tabylmady.

Mektepke bomba qoıylǵany týraly habar keshe taǵy túsip, oqýshylar men muǵalimder evakýatsııalandy. Tekserý nátıjesinde bomba joq bolyp shyqty.