Ǵımaraty tozyp tur, taraqandar órip júr: Óskemendikter № 1 emhananyń jaǵdaıyna shaǵymdandy
ÓSKEMEN. KAZINFORM — Óskemen halqy № 1 qalalyq aýrýhana ǵımaratynyń tozyp turǵanyna shaǵymdandy. Olardyń aıtýyna qaraǵanda, medıtsınalyq mekemedegi apparattar tym eski, ári ishte taraqandar da tolyp júr. Kazinform tilshisi anyq-qanyǵyn bilip kórdi.
Qaladaǵy № 1 emhana Abaı dańǵylynda oryn tepken. 1982 jyly salynǵan ǵımarattyń kúrdeli jóndeý kórmeı kele jatqanyna jarty ǵasyrǵa jýyq ýaqyt boldy.
— Aýrýhananyń búgingi jaǵdaıy máz emes. Ondaǵy tósek-oryn men emdeý apparattary KSRO zamanynan beri kele jatyr. Іshte taraqandar da qaptap júr. Jańalyqtardan ShQO-nyń medıtsınasy Astanadan keıin ekinshi orynda dep aıtylyp, jazylyp jatqanyn birneshe ret estidim. Elde ekinshi orynda tursaq, oblys ortalyǵyndaǵy birinshi aýrýhanany nege jóndemeıdi? , — deıdi aty-jónin atamaýdy suraǵan óskemendik.
Medıtsınalyq mekemede búginde 780 qyzmetker jumys isteıdi. Barlyǵy 13 bólim bar. Aýrýhana basshylyǵyna da buǵan deıin turǵyndardan shaǵym túsipti. Qazir ne istelip jatqanyn aýrýhananyń bas dárigeri Sholpan Maqasheva aıtyp berdi.
— Ras, bizdegi KT apparaty eski. Eski bolsa da qolda barmen jumys isteýimizge týra keledi. Aldaǵy jylǵa densaýlyq saqtaý basqarmasyna jańa KT apparattaryn alýǵa ótinim berdik. Biraq olardyń jaýabyn tospaı qaladaǵy Tıtan magnıı kombınatyna demeýshilik kórsetýge ótinish jasadyq. Ázirge ol jaqta qarastyrylyp jatyr. Ǵımarat eski bolǵandyqtan jándikter de kezdesedi. Dezınfektsııalyq jumystardy ýaqytyly júrgizip otyramyz. Aýrýhananyń keıbir bólikterine ótken jyly jóndeý jumystaryn júrgizdik. Bul másele bir kúnde sheshimin tappaıdy. Ýaqyt óte kele barlyǵy oıdaǵydaı bolady degen úmittemiz, — deıdi ol.
2023 jyly oblystyq bıýdjet esebinen № 1 aýrýhananyń shatyryna kúrdeli jóndeý jumystary júrgizilipti.
Bul týraly Kazinform redaktsııasynyń resmı saýalhatyna jaýap bergen ShQO densaýlyq saqtaý basqarmasy basshysynyń mindetin atqarýshy Aınash Qapanova málim etti.
— Aýrýhananyń eskirgen apparattarynyń ornyna jańa medıtsınalyq jabdyqtar alynyp jatyr. Ótken jyly jalpy sıpattaǵy transfertter aıasynda 1,4 mlrd teńgege 118 medıtsınalyq jabdyq satyp alyndy. 2025 jyly 500 mln teńgege vıdeoendoskopııalyq júıe men kompıýterlik tomograf alý josparlanǵan. Deratızatsııa tehnıkalyq sıpattamasyna sáıkes kemirgishtermen kúres aı saıyn júrgiziledi. Bıyl medıtsınalyq mekemeniń jeldetý jáne ınjenerlik júıeleri, gınekologııa bólimi men elektrmen jabdyqtaý jelileri jóndeýden ótýde, — deıdi Aınash Qapanova.
Onyń aıtýynsha, osy jyly oblys boıynsha 8 medıtsınalyq nysandy kúrdeli jóndeýge 2,4 mlrd teńge bólingen.
Jalpy óńirde 151 dáriger tapshy. Onyń ishinde Óskemendegi № 1 qalalyq aýrýhanada 8 maman jetispeıdi.
