Ǵımarat qurylysy barysynda kásibı jaýapkershilik kúsheıtiledi
ASTANA. KAZINFORM — Ǵımarat qurylysy barysynda kásibı jaýapkershilik kúsheıtiledi. Bul týraly Ónerkásip jáne qurylys mınıstrligi Qurylys jáne turǵyn úı-kommýnaldyq sharýashylyq isteri komıtetiniń tóraǵasy Baqytjan Júnisbekov aıtty.
— Qurylys kodeksinde joba satysynda kásibı jaýapkershilikti arttyrýdy sertıfıkattaý arqyly qarastyramyz. Nysandy paıdalanýǵa qabyldaý satysynda biz memlekettik qurylys ınspektorlarynyń nysanda bolýyn mindetteýdi engizemiz. Bul qurylys sapasyn rastaý úshin jasalady. Paıdalaný satysynda obektini paıdalaný talaptaryn qalaı belgileý tetigin ázirleımiz. Sonymen qatar, kepildik merzimin ulǵaıtý qarastyrylýda. Buryn salalyq nysandar úshin kepildik merzimi 2 jyldan bastap bolatyn. Al Qurylys kodeksinde bul merzim 5 jyl jáne odan joǵary bolýy qarastyrylǵan, — dedi ol Ortalyq kommýnıkatsııalar qyzmetindegi brıfıngte BAQ ókilderiniń saýalyna oraı.
Onyń aıtýynsha, qasbet kirpishi qulap, feldsher qazaq bolǵan úı osydan 20 jyldan astam ýaqyt buryn paıdalanýǵa berilgen.
— Sondyqtan paıdalanylatyn nysandar, olardyń kútilip ustalýy men qaýipsizdigi balans ustaýshy tarapynan qamtamasyz etilýi tıis. Bul turǵyn úılerge, qoǵamdyq ǵımarattarǵa jáne kommertsııalyq nysandarǵa qatysty. Múlik ıeleri birlestigi mindetti túrde múlikti kútip ustaýy tıis. Atalǵan jaǵdaıda qorshaý materıaldary men konstrýktsııalary olardy qaýipsiz paıdalanatyndaı kúıde bolýy qajet, — dedi Baqytjan Júnisbekov.
Esterińizge sala ketsek, 8 qarashada elordada turǵyn úı kesheniniń qasbetindegi kirpish qaptamasy men kondıtsıoner qondyrǵysynyń bóligi qulap, saldarynan 5 adam zardap shekti. Zardap shekkenderdiń bári № 1 kópsalaly aýrýhanaǵa jetkizildi.
18 qarashada jaraqat alǵandardyń biri feldsher Uldana Myrzýan kóz jumdy.