Elimizde ǵımarat, qurylys jáne ınjenerlik kommýnıkatsııalardy tsıfrlandyrý deńgeıi ósti
ASTANA. KAZINFORM – Qazaqstan Respýblıkasynda Memlekettik qala qurylysy kadastrynyń biryńǵaı avtomattandyrylǵan aqparattyq júıesin (AIS MQK) qalyptastyrý aıasynda ınjenerlik jáne áleýmettik ınfraqurylym nysandaryn tsıfrlandyrý jumystary qarqyndy túrde jalǵasyp jatyr.
Ónerkásip jáne qurylys mınıstrliginiń málimetinshe, búgingi tańda ǵımarattar men qurylystardy, sondaı-aq aýdan ortalyqtaryna deıingi eldi mekenderdi qosa alǵanda, ınjenerlik kommýnıkatsııalardy tsıfrlandyrý deńgeıi 93%-ǵa jetken.
– 2025 jyldan bastap halqy 5 myńnan astam adamdy quraıtyn eldi mekenderdiń ınjenerlik jelilerin tsıfrlandyrý jumystary bastaldy. Bul jumystar «Qazaqstan Respýblıkasyndaǵy sáýlet, qala qurylysy jáne qurylys qyzmeti týraly» Zańǵa sáıkes júrgizilip jatyr. Zań aıasynda memlekettik qala qurylysy kadastry AIS MQK júıesinde júrgiziledi jáne qala qurylysy jobalarynyń, ǵımarattar men qurylystardyń, ınjenerlik ınfraqurylym elementteriniń tsıfrlyq derekterin biriktiredi, - delingen mınıstrlik habarlamasynda.
Qurylysy júrgizilgen aýmaqtardaǵy jerasty jáne jerústi kommýnıkatsııalarǵa túgendeý júrgizý arqyly olardyń naqty keńistiktik ornalasýyn jáne negizgi tehnıkalyq sıpattamalaryn aıqyndaı otyryp, tsıfrlyq kadastrlyq karta qalyptastyrylady. Bul karta eldi mekenderdi júıeli túrde damytýǵa, aýmaqtyń qurylysyn baqylaýǵa, nysandardy salý men paıdalanýǵa úılesimdi kózqaras qalyptastyrýǵa negiz bolady.
Qala qurylysy kadastrynyń geoportaly arqyly arhıtektýra, qala qurylysy jáne qurylys salasyndaǵy ýákiletti organdar ınjenerlik ınfraqurylymǵa qatysty tsıfrlyq derekterge qol jetkize alady. Bul sheshimder qabyldaý úderisiniń ashyqtyǵy men tıimdiligin arttyrady.
Tsıfrlyq qala qurylysy derekter bazasyn qalyptastyrý jumystary josparly túrde jalǵasyp, aýmaqtyq josparlaý men qalalyq ortany damytý júıesin tsıfrlyq túrlendirýdiń mańyzdy quramdas bóligi sanalady.
Eske salsaq, budan buryn Astanada jańa tsıfrlyq vaýcherlik júıe iske qosylǵanyn jazǵan edik.