Gımalaıda 7400 metr bıiktikte qalǵan alpınıst qyz qutqaryldy
ASTANA. QazAqparat - Gımalaıdyń Nanga-Parbat shyńyndaǵy asa qaýipti betkeılerdiń birinde joǵalyp ketken frantsýz Elızabet Revol uzaqqa sozylǵan izdeýden soń tabyldy.
Aýa raıynyń qolaısyzdyǵynan ekinshi alpınısti izdeý jumystary toqtatyldy, dep habarlaıdy Euronews.
26 qańtarda Polsha jáne Frantsııa alpınısteri Tomash Matskevıch pen Elızabet Revol Gımalaıdyń soltústik batysyndaǵy shyńdarynyń birinde, 7400 metr bıiktikte qarǵa maltyǵyp qalǵan.
Alpınıster túndi sonda ótkizip, ertesine tómen túsýge árekttengen. Biraq munyń sáti túspegen.
Bılik oryndarynyń málimdeýinshe, Pákistannyń tikushaqtary jeksenbide, kúndiz 6700 bıiktikte joǵalǵan alpınısterdi baıqaıdy. Olardy qutqarýǵa sol mańdaǵy polshalyq alpınıster attanǵan.
Nanga-Parbat taýlary álemdegi eń qaýipti shyńdardyń biri. Ótken jyly maýsym aıynda ony baǵyndyrmaq bolǵan eki alpınıst ajal qushqan bolatyn.
