Gımalaı taýynda segiz alpınıst joǵalyp ketti
NUR-SULTAN. QazAqparat - Úndistannyń eń bıik shyńdarynyń biri Nanda-Devıge kóterilip kele jatqan segiz alpınıst habar-osharsyz ketti. Olar - Ulybrıtanııa, AQSh, Aýstralııa jáne Úndistan azamattary, dep habarlaıdy QazAqparat BBC-ge silteme jasap.
Olardy izdeýge áskerı avıatsııa jumyldyrylǵan. Qutqarýshylar alpınısterdiń aman qalýy ekitalaı ekenin aıtyp otyr.
Úndistan alpınızm ınstıtýtynan shyqqan ofıtser, tórt brıtanııalyq, eki amerıkalyq jáne bir aýstralııalyq baǵyndyrý asa qıyn shyńdardyń biri sanalatyn Nanda-Devıge kóterilýdi 13 mamyr kúni bastaǵan. Shyńnyń teńiz deńgeıinen bıiktigi - 7816 metr. Alpınıster aldymen buryn eshkim shyqpaǵan 6 477 metrlik shyńǵa kóterilmek bolǵan.
Jospar boıynsha, 31 mamyr kúni alpınıster lagerge oralýy tıis bolatyn. Olardan habar bolmaǵan soń, bazadaǵylar dabyl qaqqan.
Jergilikti bılik ókilderiniń joramalynsha, 27 mamyr kúni taýda qar kóshken bolýy múmkin. Joǵalǵan alpınısterge senbi kúni izdeý salynǵan. Biraq aýa raıynyń nasharlaýyna baılanysty, operatsııa toqtatylyp, erteńine qaıta bastalǵan.
Qutqarýshylar qar kóshken jerge jetkenshe 3-4 kún qajet. «Olardy tiri tabý múmkindigi eles sııaqty», - deıdi Ýttarakhand shtatynyń Pıthoragarh okrýginiń basshysy Vıdjaı Kýmar.
