Gımalaı aıýlary jańa orynǵa kóshti
ALMATY. QazAqparat - Almaty zoobaǵynda gımalaı aıýlaryna arnalǵan jańa voler salyndy. Qońyr aıýlar búgin jańa jaıǵa qonys aýdardy, dep habarlaıdy QazAqparat tilshisi.
Baıkal men Býdýr Almaty zoobaǵynda 20 jyldan beri ómir súrip keledi. Býdýr 20 jyl buryn - Máskeý zoobaǵynan, Baıkal - Shymkent zoobaǵynan ákelingen.
20 jyldan beri janýarlar tot basqan temir torly tar volerde ómir súrip kelgen.
«Bizdiń demeýshiler zoobaǵymyzdyń kezekti jubyna jańa baspana syılady. Býdýr men Baıkal týǵaly beri kók maısa men jerdi kórmegen. Gımalaı aıýlary aǵashqa órmelegendi jaqsy kóredi. Biraq olardyń eski volerinde ondaı múmkindik bolmady», - dedi zoobaq dırektory Erjan Erkinbaev.
Aıýlardyń baspanasynda qazir bári bar. Tabıǵı kók shóp tóselgen. Shaǵyn sýat, aǵash, oıynshyqtar bar.
«Ótkende bir oqıǵa bolǵan. Kelýshilerdiń biri aıýlardy ózine qaratý úshin tas atqan. Endi ondaı jaǵdaıdy boldyrmaý úshin eki araǵa áınek ornatyldy. Endi olarǵa eshkim tas ata almaıdy. Joba nemis mamany Pıter Azbahtyń keńesimen jasaldy. Avtomatty júıe men úsh qabatty trıpleks paıdalanyldy. Qysta aıýlar ishki apanda uıyqtaıdy, jazda bergi jaǵynda júredi», - dedi joba avtory Sergeı Spıtsyn.
Jaqyn arada Almaty zoobaǵyndaǵy Amýr jolbarystaryna jańa baspananyń qurylysy bastalady.
Qazirgi tańda múıiztumsyqtardyń ekspozıtsııasy aıaqtalyp qaldy, pilderdiń tóbesi jabyldy.
Volerlerde tazalyq jumystary jıi júrgizile bastady.
