Ǵylymnyń nátıjeleri formaldy kórsetkishtermen baǵalanady – Joǵary aýdıtorlyq palata
ASTANA. KAZINFORM – Baǵdarlamalyq-nysanaly qarjylandyrýdyń 18 jobasy boıynsha 56 patent jobalardy iske asyrýǵa qatyspaǵan uıymdarǵa tıesili bolǵan. Bul týraly Quryltaı otyrysynda Joǵary aýdıtorlyq palata tóraǵasy Álıhan Smaıylov aıtty.
- Ǵylymnyń nátıjeleri formaldy kórsetkishtermen baǵalanady. Jobalardyń nátıjeliligi kóbinese basylymdar, qorǵaý qujattary jáne engizý aktileri negizinde rastalady. Biraq bul kórsetkishter nátıjeniń jańashyldyǵyn, quqyq ıeligin jáne is júzinde qoldanylýyn árdaıym dáleldeı bermeıdi. Granttyq jáne baǵdarlamalyq-nysanaly qarjylandyrý jobalary boıynsha 4000-ǵa jýyq qorǵaý qujattary qabyldandy, - dedi ol.
Palata tóraǵasynyń málimetinshe, ónertabysqa beriletin patentter shamamen 10 paıyzdy, Eýrazııalyq jáne halyqaralyq patentter 1 paıyzdy ǵana quraıdy. Sonymen qatar 72 mıllıard teńgeni quraıtyn 164 joba boıynsha patent alýǵa 336 ótinim nátıje retinde qabyldanǵan.
- Alaıda ótinim patent alýdy bildirmeıdi. Baǵdarlamalyq-nysanaly qarjylandyrýdyń 18 jobasy boıynsha 56 patent jobalardy iske asyrýǵa qatyspaǵan uıymdarǵa tıesili ekendigi anyqtaldy. Engizý aktileri de nátıjeni árdaıym rastaı bermeıdi. 59 mıllıard teńgeni quraıtyn 434 joba boıynsha 1 200-den astam engizý aktisi usynylǵan. Onyń jartysy bilim berý protsesine qatysty. Biraq, mundaı engizý tehnologııalyq, óndiristik nemese ózge de qoldanbaly nátıjege qol jetkizýdi rastamaıdy, - dedi Álıhan Smaıylov.
Buǵan deıin 2025 jylǵy ǵylymı jobalarǵa arnalǵan konkýrstar 208 kúnge deıin keshiktirilip jarııalanǵanyn jazǵan edik.
