Ǵylymı jobalardy irikteý júıesi qaıta qaralady — Saıasat Nurbek
ASTANA. KAZINFORM – Ǵylym salasyndaǵy jobalardy irikteý men qarjylandyrý tetikteri jetildirilip, birqatar rásimdik ózgerister engiziledi. Bul týraly Úkimet otyrysynan keıingi baspasóz máslıhatynda Ǵylym jáne joǵary bilim mınıstri Saıasat Nurbek málimdedi.
Baspasóz máslıhaty barysynda jýrnalıster Memleket basshysynyń ǵylym salasyna qatysty syny jóninde suraq qoıdy. Mınıstr bul synnyń oryndy ekenin aıtty.
– Memleket basshysy kótergen másele oryndy. Qazirgi tańda saraptaý súzgileri men jobalardy irikteý tetikteri tolyq jumys istemeı otyrǵan tustar bar. Sonyń saldarynan ǵylymı jańalyǵy bar, negizdelgen jobalardyń bári birdeı qarjylandyrý kezeńine jete bermeıdi. Sondyqtan bul baǵytta aýqymdy jumys júrgizilip jatyr, – dedi ol.
Mınıstrdiń aıtýynsha, 2023 jyldan beri mınıstrlik, Ǵylym qory, vedomstvolyq uıymdar jáne Ǵylym komıteti shamamen 15 ret tekserýden ótken. Sonyń ishinde sońǵy tekserýdi Bas prokýratýra júrgizgen.
– Barlyq anyqtalǵan kemshilikter eskerilip, birneshe jumys jospary ázirlendi. Sonymen qatar 2023 jyly Sybaılas jemqorlyqqa qarsy is-qımyl agenttigimen birlesip, táýekelderge syrtqy taldaý júrgizildi. Nátıjesinde 1344 tarmaqtan turatyn jospar ázirlendi, – dedi mınıstr.
Onyń aıtýynsha, «Ǵylym týraly» zańǵa túzetýler Májiliske engizilip, qazir qaralyp jatyr. Qujat qabyldanǵannan keıin kóptegen rásimdik máseleler qaıta qaralady.
Saıasat Nurbek ǵylymı qaýymdastyq jıi kóteretin máselelerdiń biri – konkýrs rásimderiniń uzaqtyǵyna da toqtaldy.
– Ashyǵyn aıtqanda biz ǵalymdardyń ýaqytyn joǵaltyp otyrmyz. Sondyqtan endi ǵylymı jobalar boıynsha mindettemeler kelisimshartqa qol qoıylǵan sátten bastap esepteledi. Mysaly, kelisimshart qazan aıynda jasalsa, 36 aılyq merzim sol ýaqyttan bastalady, – dedi ol.
Mınıstrdiń aıtýynsha, mundaı júıeli sheshimder ǵylym salasyndaǵy problemalardy azaıtýǵa múmkindik beredi.
Aıta keteıik, buǵan deıin Úkimet otyrysynda ǵylymı jetistikter kórsetkishin óńir ákimderiniń reıtıngine qosý qajettigi aıtylǵan edi.
