Smaıylov: Ǵylymı jobalar qaǵaz kúıinde qalyp otyr
ASTANA. KAZINFORM — Jalpy somasy 32 mıllıard teńgeni quraıtyn 159 joba tolyqqandy memlekettik esepten tys qalǵan. Bul týraly Quryltaı otyrysynda Joǵary aýdıtorlyq palata tóraǵasy Álıhan Smaıylov aıtty.
— Ǵylymı nátıje engizýge deıin jetkizilmeıdi. Jobanyń qorytyndy esebi qabyldanǵannan keıin nátıjeniń odan ári qoldanylýy júıeli túrde baqylanbaıdy. Aýdıtorlyq irikteýmen qamtylǵan 60 patent boıynsha olardy paıdalanýdyń lıtsenzııalyq nemese ózge de sharttary jasalmaǵan. Qoldanystaǵy ǵylymı tájirıbede jobany iske asyrý is júzinde eseppen ǵana aıaqtalady, ıaǵnı, memleket túpkilikti tehnologııalyq jáne ekonomıkalyq áserin kórmese de, ǵylymı jobalardy qarjylandyrady, — dedi ol.
Palata tóraǵasynyń paıymynsha, memleket ǵylym nátıjelerin júıeli túrde esepke almaıdy jáne ony basqara almaı otyr. Sonymen qatar tsıfrlandyrýdyń tómen deńgeıi — ǵylym salasynyń nashar basqarýdyń basty sebepteriniń biri.
— Esepke alý túrli qatysýshylar men júıeler arasynda bólek júrgiziledi. Protsesterdiń bir bóligi qaǵaz túrinde iske asyrylady. Sondyqtan memleket jobanyń qarjylandyrýdan bastap, nátıjesine jetý, olardyń engizilýine deıingi tolyq protsesin kórmeıdi. Bul ásirese ǵylymı zertteýge jáne tájirıbelik-konstrýktorlyq jumystarǵa jumsalatyn 1 paıyzdyq tetik boıynsha baıqalady. 32 mıllıard teńgeni quraıtyn 159 joba tolyqqandy memlekettik esepten tys qaldy, — dedi Álıhan Smaıylov.
Aıta keteıik, ǵylymı zertteýlerge jáne tájirıbelik-konstrýktorlyq jumystarǵa arnalǵan qarajat tolyq ǵylymǵa baǵyttalmaıtynyn jazǵan edik.
