Ǵylymı joba jeńimpazdary men pedagogterge memlekettik syıaqy berilýi múmkin
ASTANA. KAZINFORM — 2026 jyly bilim berýdiń tutas jáne ornyqty júıesin qurýǵa baǵyttalǵan sharalar júzege asyrylady. Bul týraly Úkimettiń baspasóz qyzmeti habarlady.
Memleket basshysynyń tapsyrmalary sheńberinde Oqý-aǵartý mınıstrligi ornyqty bilim berý júıesin qalyptastyrý boıynsha jumystar júrgizip jatyr. 2026 jyldaǵy negizgi bastamalar men jańashyldyqtar týraly QR oqý-aǵartý vıtse-mınıstri Shynar Aqparova aıtyp berdi.
— Oqý-aǵartý mınıstrligi Memleket basshysynyń tapsyrmalaryn oryndaý maqsatynda bilim berý júıesinde aýqymdy sharalardy júzege asyrýdy josparlap otyr. Onyń ishinde «Pedagog mártebesi týraly» Zańǵa ózgerister engizilip jatyr. Bul ózgerister pedagogterdi artyq qaǵazbastylyqtan qorǵaýǵa, mektepten tys ýaqytta balalarǵa qatysty jazataıym oqıǵalar úshin ata-analardyń da jaýapkershiligin naqtylaýǵa, sondaı-aq pedagog quqyǵyn qorǵaýdy kúsheıtýge baǵyttalǵan, — dep atap ótti Shynar Aqparova.
Sondaı-aq 2026–2030 jyldarǵa arnalǵan «Qazaqstan balalary» biryńǵaı baǵdarlamasynyń tujyrymdamasyn bekitý týraly Úkimettiń qaýlysynyń jobasy ázirlendi. Bul qujat balalardyń quqyqtaryn qorǵaý, balanyń qaýipsizdigi, bilim alý quqyǵy, densaýlyq saqtaý quqyǵy, áleýmettik qoldaý salasyndaǵy barlyq qoldanystaǵy sharany biriktiredi.
Mamandandyrylǵan bilim berý uıymdaryn jańartý jalǵasady, sonyń ishinde Abaı atyndaǵy mektep-ınternaty Abaı mektebine transformatsııalanyp, jańa oqý mazmunmen tolyqtyryldy.
Sonymen birge jetim balalar men ata-anasynyń qamqorlyǵynsyz qalǵan balalardyń quqyn qorǵaýdy kúsheıtý jáne bilim berý salasyndaǵy yntalandyrý tetikterin jetildirý boıynsha sharalar qabyldanyp jatyr. Máselen, halyqaralyq ǵylymı joba konkýrstarynyń jeńimpazdaryna, sondaı-aq olardy daıarlaǵan pedagogterge birjolǵy memlekettik syıaqy qarastyrylǵan.
Sondaı-aq «Múmkindigi shekteýli balalardy keshendi qoldaý týraly» Zań jobasy qaralyp jatyr.
Barlyq qabyldanyp jatqan sharalar balanyń múddesine, pedagogtardy qoldaýǵa jáne sapaly bilimge teń qol jetkizýge baǵdarlanǵan tutas jáne ornyqty bilim berý júıesin qurýǵa baǵyttalǵan.
Budan buryn muǵalim júktemesin azaıtýǵa baǵyttalǵan Ulttyq bilim berý platformasy iske qosylatyny belgili boldy.