Ǵylymı jetistikter kórsetkishin oblys ákimderiniń reıtıngterine qosý qajet
ASTANA. KAZINFORM – Ǵylymı jetistikter kórsetkishin oblys ákimderiniń reıtıngterine qosý qajet. Bul týraly Úkimet otyrysynda Premer-mınıstr Oljas Bektenov aıtty.
- Ǵylym men ınnovatsııany damytý jańa Konstıtýtsııada memleket qyzmetiniń strategııalyq baǵyty dep tanyldy. Prezıdent Úkimettiń keńeıtilgen otyrysynda ınnovatsııalar elimizdiń teńdessiz basymdyqtary retinde aıqyndalǵanyn atap ótti. Ekonomıka salalaryndaǵy jetistikter men tabystardyń deni ınnovatsııalyq damýdyń aýqymy men qarqynyna tikeleı baılanysty. Innovatsııalar eńbek ónimdiligin arttyrýǵa jáne joǵary tehnologııalyq jumys oryndaryn qurýǵa negiz bolady. Memleket ǵylym men ınnovatsııany damytý úshin qolaıly jaǵdaılardy qamtamasyz etip jatyr. Sońǵy alty jylda respýblıkalyq bıýdjetten ǵylymǵa bólinetin qarjy 6 ese ósti, - dedi Úkimet basshysy.
Onyń málimetinshe, osy jyldyń 1 qańtarynan bastap ǵylymı ázirlemelerge salynatyn jeke ınvestıtsııalardy yntalandyrý úshin shyǵystardyń 300 paıyzyna deıin eleýli salyq jeńildikteri qaralǵan. Bıýdjet kodeksinde jer qoınaýyn paıdalanýshylardyń ken óndirýge jumsalatyn shyǵystarynyń 1%-yn ǵylym men ınnovatsııalyq tehnologııalardy damytý úshin bıýdjetke tikeleı jiberý mindeti bekitildi. Innovatsııalardy venchýrlik qarjylandyrý quraldary keńeıip, tehnologııalyq brokerlik pen bıznes-akseleratsııany qoldaý sharalary kúsheıtildi.
- Ǵylymı zertteýlerdiń nátıjelerin kommertsııalandyrý úshin túrli qarjy quraldary engizilýde. Kommertsııalandyrý jobalaryn granttyq qarjylandyrý aıasynda bıznestiń eń tómengi qosymsha qarjylandyrý úlesi aıqyndaldy. Ol jalpy grant somasynyń keminde 25%-yn quraýǵa tıis. Óńirlik ǵylymdy damytý úshin quqyqtyq jáne bıýdjettik baza quryldy. Ǵylymı jetistikter kórsetkishi aımaqtardy damytý josparlaryna engizildi. Ony, sondaı-aq oblystarmen qatar ákimderdiń de reıtıngterine qosý qajet, - dedi Oljas Bektenov.
Buǵan deıin Úkimet otyrysynda ınnovatsıchlardy damytý máselesi talqylanatynyn jazǵan edik.