Ǵylymı zertteýler qaıtalanbaýy úshin ortaq derekter bazasy qajet — depýtat
ASTANA. KAZINFORM — Qazaqstanda ǵylymı zertteýlerdiń nátıjelerin biriktiretin ortaq derekter bazasyn qalyptastyrý qajet. Bul bir taqyryptyń birneshe ret zerttelýine jol bermeı, bıýdjet qarajatyn tıimdi paıdalanýǵa múmkindik beredi.
Mundaı usynysty Quryltaı depýtaty Aıjan Sqaqova Dúnıejúzilik ǵylym kúnine oraı ótken halyqaralyq konferentsııada aıtty.
Depýtattyń sózinshe, búginde ǵylymı zertteýlerdiń nátıjeleri memlekettik deńgeıdegi sheshimder qabyldaý kezinde jetkilikti paıdalanylmaıdy. Sonymen qatar ǵalymdardyń buryn júrgizilgen zertteýler týraly tolyq aqparat alý múmkindigi shekteýli.
— Qazir jasandy ıntellekt pen tsıfrlandyrý jyly aıasynda tehnologııalar qarqyndy damyp jatyr. Biraq ǵylymı ortada zertteýler men olardyń nátıjelerin qamtıtyn biryńǵaı derekter bazasy qajet. Ǵylymı jobalarǵa ótinim bergen kezde buryn qandaı zertteýler júrgizilgenin kóre alýymyz kerek. Bul zertteýlerdiń qaıtalanýyn boldyrmaýǵa jáne memleket resýrstaryn únemdeýge múmkindik beredi, — dedi spıker.
Onyń aıtýynsha, ǵylymı jobalardyń basym bóligi bıýdjet qarajaty esebinen qarjylandyrylady. Sondyqtan buryn istelgen jumystardyń nátıjelerin qoljetimdi etý memlekettik qarjynyń tıimdi jumsalýyna yqpal etedi.
— Ǵylymı zertteýler men memlekettik basqarý arasyndaǵy baılanysty kúsheıtý qajet. Ǵylymı derekter men zertteý nátıjeleri basqarýshylyq sheshimder qabyldaý kezinde keńinen qoldanylýy tıis, — dep qosty ol.
Aıjan Sqaqova bul másele Ǵylym jáne joǵary bilim mınıstrligine jazbasha joldaý josparlanyp otyrǵanyn jetkizdi.
Aıta keteıik, buǵan deıin atalmysh jıynda Qazaqstannyń bes oblysynda kóktemgi tasqyn sýdy jer astyna jınap, sý qoryn tolyqtyrý múmkindigi zerttelgeni aıtyldy.
