«Ǵylymı Oskar» ıelengen qazaqstandyq oftalmolog jańa qurylǵynyń múmkindigin túsindirdi
ASTANA.KAZINFORM – Qazaqstandyq oftalmolog Muhıt Qulmaǵanbet Gonkongta ótken ICT Startup Award halyqaralyq baıqaýynda Hardware and Device nomınatsııasy boıynsha altyn júlde ıelendi. Onyń SLOPE atty ınnovatsııalyq qurylǵysy kóz aýrýlaryn erte kezeńde anyqtaýǵa arnalǵan.
– SLOPE qurylǵysynyń basty ereksheligi – polıarızatsııalyq sáýleni paıdalanyp, kóz túbindegi torly qabyqtyń, naqtyraq aıtqanda makýlanyń qyzmetin baǵalaı alýynda, – deıdi oftalmolog Muhıt Qulmaǵanbet.
Dárigerdiń aıtýynsha, makýla – adamnyń negizgi kórý qabiletine jaýap beretin aımaq. Makýlıarly degeneratsııa nemese dıstrofııa sekildi aýrýlar bastapqy kezeńde baıqalmaıdy jáne qazirgi dıagnostıkalyq qurylǵylarmen anyqtalmaıdy. Al SLOPE osy ózgeristerdi erte kezeńde tirkeýge múmkindik beredi.
– Bul qurylǵy ázirge prototıp deńgeıinde. Biraq bolashaqta torly qabyq aýrýlaryn erte dıagnostıkalaýǵa arnalǵan qural retinde dárigerlerdiń kúndelikti tájirıbesine engizýdi kózdep otyrmyz, – deıdi ol.
Jobanyń halyqaralyq baıqaýda jeńiske jetýi jańa múmkindikterge jol ashqan. Atap aıtqanda, jeke ınvestıtsııa tartý, memlekettik qoldaý, sheteldik konferentsııalar men ǵylymı alańdarǵa shyǵý múmkindigi artyp otyr.
Qazirgi tańda SLOPE qurylǵysynyń prototıpi Gonkong pen Kanadadaǵy birqatar jeke kóz klınıkalarynda synaqtan ótip jatyr. Sheteldik dárigerler ony tájirıbede qoldanyp, jetildirýge qatysty usynystaryn berip jatyr.
– Qazaqstanǵa bul qurylǵyny ákelý – úlken armanym. Sebebi makýlıarly aýrýlardyń erte dıagnostıkasy elimizde áli de ózekti másele, – deıdi ol.
Aıta keteıik, oftalmologtyń aıtýynsha, jasy ulǵaıǵan adamdarda makýlıarly degeneratsııa men glaýkoma, al jastar arasynda mıopııa men kózdiń qurǵaýy jıi kezdesedi. Buǵan gadjetterdi uzaq paıdalaný negizgi sebepterdiń biri bolyp otyr.
Buǵan deıin 1–2 jasar balalar arasynda kózdiń qylılanýy kóbeıip bara jatqany týraly oftalmolog pikirin jarııalaǵan bolatynbyz.