Ǵylymı konkýrs nátıjelerin belgilengen merzimde jarııalaý mindetti bolady

ASTANA. KAZINFORM — Ulttyq ǵylym akademııasynyń kvazımemlekettik sektor sýbektisi mártebesi zań júzinde bekitiledi. Bul týraly Májilistiń jalpy otyrysynda «QR-nyń keıbir zańnamalyq aktilerine ǵylym máseleleri boıynsha ózgerister men tolyqtyrýlar engizý týraly» zań jobasyn tanystyrǵan depýtat Ashat Aımaǵambetov aıtty.

— Zań jobasy aıasynda Ulttyq ǵylym akademııasynyń jumysyn tejep turǵan birneshe máseleni sheshemiz. Onyń kvazımemlekettik sektor sýbektisi mártebesin zań júzinde bekitemiz. Bul akademııanyń múlkin qalyptastyrý tártibin naqty retteýge, basqarý tetigin júıeleýge jáne turaqty qarjylandyrý kózderin aıqyndaýǵa jaqsy múmkindik beredi. Ǵylym akademııasy úshin bul — óte qajet ózgerister, — dedi depýtaty.

Onyń sózine qaraǵanda, ǵylymı jobalar boıynsha konkýrs nátıjelerin jarııalaý merzimderi búginde zańmen naqty reglamenttelmeıdi.

— Qazirgi tańda bul merzimder aıqyn bekitilmegendikten rásimder jıi sozylady. Al ǵalymdar belgisizdik jaǵdaıda qalady. Biz rásimderdi ýaqytyly ótkizip, konkýrs nátıjelerin belgilengen merzimde jarııalaýdy mindetteıtin arnaıy normalardy qarastyryp otyrmyz, — dedi Ashat Aımaǵambetov.

Aıta keteıik, atalǵan zań jobasy aıasynda ǵylymı jobany bastaý merzimin naqty sol kelisimshart bastalǵan kúnnen belgileý kózdelgen.