Ǵylymı qyzmetkerlerdiń eńbekaqysy tóńiregindegi daý: Saıasat Nurbek jaýap berdi
ALMATY. KAZINFORM – Ǵylym jáne joǵary bilim mınıstri Saıasat Nurbek ǵylymı qyzmetkerlerdiń eńbekaqysy tóńiregindegi daýǵa jaýap berdi.
Áleýmettik jelide QR Prezıdenti janyndaǵy Ulttyq ǵylym akademııasynyń Jas ǵalymdar keńesi 2025 jyldyń 5 qańtarynda kúshine engen ǵylymı qyzmetkerlerdiń eńbekaqy tóleý qaǵıdalaryna qarsylyq bildirdi.
Jelide jarııalaǵan jazbaǵa 100-ge jýyq pikir jazyldy. Osy oraıda, Kazinform tilshisi Ulttyq ǵylym akademııasynyń Jas ǵalymdar keńesiniń tóraǵasy Maqsat Jabaǵınmen baılanysyp, jańa qaǵıdalarǵa aıtylǵan synnyń sebebin anyqtady.
- 2025 jylǵy 5 qańtarda ǵylymı qyzmetkerlerdiń eńbekaqy tóleý qaǵıdalary qabyldandy. Buǵan deıin mundaı ereje bolmaǵan jáne ǵalymdar granttyq nemese baǵdarlamalyq-nysanaly qarjylandyrý aıasynda utyp alǵan jobalarynda ǵylymı qyzmetkerlerdiń eńbekaqysyn jobany iske asyratyn ǵylymı jetekshi ózi bóletin. Ol jumystyń kúrdeliligine, aýqymyna jáne árbir zertteýshiniń naqty úlesine baılanysty júrgiziletin. Bul durys tártip bolatyn. Óıtkeni ǵylymı jobany iske asyrý – shyǵarmashylyq protsess, ony qatań standarttarǵa salýǵa nemese belgilengen stavkalarmen shekteýge bolmaıdy, - dedi Maqsat Jabaǵın.
Onyń aıtýynsha, eńbekaqynyń barlyǵyna birdeı belgilengen biryńǵaı mólsherin anyqtaıtyn ereje – otandyq ǵylymdaǵy bıýrokratııanyń kúsheıýiniń belgisi. Jas ǵalymdar keńesiniń tóraǵasy ǵylymǵa qatysty qandaı da bir reforma júrgizbes buryn ǵalymdardyń ózimen aqyldasqan jón ekenin atap ótti.
- Bizdiń usynysymyz – mınıstrlik belgilegen №592 qaǵıdalary ǵylym salasyndaǵy kepildendirilgen eń tómengi eńbekaqy deńgeıi retinde bekitilýi tıis, biraq eń joǵary eńbekaqy mólsherine shekteý qoıylmaýy qajet. Eń joǵary eńbekaqy mólsherin ǵylymı jobalar men baǵdarlamalar jetekshileri bekitilgen ǵylymı ótinim bıýdjeti sheńberinde ózderi anyqtaýy tıis, - dep atap ótti Maqsat Jabaǵın.
QR Ǵylym jáne joǵary bilim mınıstri Saıasat Nurbek aıtylǵan másele boıynsha Kazinform tilshisiniń saýalyna jaýap berip, bul norma aldaǵy ýaqytta qaıta qaralatynyn aıtty.
- Ótken aptada biz ǵylymı-zertteý ınstıtýttarynyń basshylarymen, jas ǵalymdarmen 5 úlken sessııa ótkizdik. Olardyń barlyq usynysyn jınadyq. Kelesi aptada bul buıryqqa ózgeris engiziledi. Qarjylaı shekteý alynady jáne jańa buıryq shyǵady. Oǵan qosa, jańa baıqaýlarǵa sol ózgeristermen tolyqqandy esepterin bere alady, - dedi mınıstr.
Eske salaıyq, buǵan deıin Senat depýtaty Ǵalıasqar Sarybaev ǵylymdy basqarýda áli de bıýrokratııa bar ekenin aıtqan bolatyn.