Ǵylymı derekter vaktsınatsııanyń aýtızmge sebep bolatynyn rastamaıdy — DDU
ASTANA. KAZINFORM — Dúnıejúzilik densaýlyq saqtaý uıymy 2010–2025 jyldar aralyǵynda vaktsınatsııa, tıomersal jáne aýtızm spektriniń buzylystary (ASB) arasyndaǵy yqtımal baılanysqa qatysty ǵylymı derekterge júıeli sholý-taldaý júrgizdi.
Qazaqstan Respýblıkasynyń Densaýlyq saqtaý mınıstrliginiń Sanıtarııalyq-epıdemıologııalyq baqylaý komıtetiniń málimetinshe, sholýǵa 36 ǵylymı jarııalanym, onyń ishinde 31 zertteý men 5 meta-taldaý, sondaı-aq ǵylymı konteksti baǵalaý úshin 21 sholý engizildi.
Zertteý nátıjeleri vaktsınatsııa men aýtızm arasynda sebep-saldarlyq baılanys bar ekenin rastamaǵan.
— Zertteýler men meta-taldaýlar vaktsınatsııa men aýtızm arasynda sebep-saldarlyq baılanystyń joq ekenin rastady. Osylaısha, qazirgi ǵylymı derekterdiń jıyntyǵy vaktsınalardyń aýtızm nemese neıro damýdyń basqa da buzylystarynyń damý qaýpin arttyratynyn rastamaıdy, — delingen habarlamada.
Eske salaıyq, buǵan deıin Dúnıejúzilik densaýlyq saqtaý uıymy aýtızm men paratsetamol arasyndaǵy baılanys týraly aqparatty joqqa shyǵarǵan edi.
