Ǵylymǵa úsh jylda 730,6 mıllıard teńge bólindi
ASTANA. KAZINFORM — Qazaqstanda 2024–2026 jyldary ǵylym salasyn qarjylandyrýǵa 730,6 mıllıard teńge bólingen.
Bul týraly QR Prezıdenttik ortalyǵynyń dırektory Baqytjan Temirbolat Astanada ótip jatqan «Ortalyq Azııa elderin turaqty damytýǵa arnalǵan ǵylym, derekter jáne boljaý» halyqaralyq konferentsııasynda aıtty.
— Memleket ǵylym salasyna júıeli túrde qoldaý kórsetip keledi. 2024–2026 jyldarǵa ǵylymdy qarjylandyrýǵa 730,6 mıllıard teńge bólindi. Bul aldyńǵy úsh jyldyq kezeńmen salystyrǵanda 9 paıyzǵa kóp. Onyń alǵashqy nátıjelerin de baıqap otyrmyz, — dedi Baqytjan Temirbolat.
Sonymen birge ol Halyqaralyq valıýta qorynyń jasandy ıntellektke daıyndyq ındeksinde Qazaqstan 0,55 kórsetkishpen álemdegi úzdik 50 eldiń qataryna engenin atap ótti.
— Bul damýshy naryǵy bar memleketterdiń ortasha kórsetkishinen joǵary, — dedi mekeme dırektory.
Sonymen qosa, Baqytjan Temirbolat klımattyń ózgerýi, energetıkalyq daǵdarys pen resýrstar tapshylyǵy sııaqty jahandyq máselelerdi sheshýde ǵylym men ınnovatsııanyń mańyzy artyp kele jatqanyn da tilge tıek etti.
— Qazirgi kezeńde jańa tehnologııalar men jasandy ıntellektini tereń meńgergen elder ǵana damyp jatyr. Sondyqtan ǵylym men bilimdi damytý Qazaqstannyń strategııalyq baǵytynyń mańyzdy bóligine aınalyp otyr, — dedi ol.
Aıta keteıik, buǵan deıin osy jıynda Quryltaı depýtaty aýyl sharýashylyǵy salasyndaǵy ǵylymı jobalardy qarjylandyrý merzimin qazirgi 3 jyldan 5–10 jylǵa deıin uzartýdy usynǵan edi.
