Ǵylymǵa ınvestıtsııa artady: Jańa jospar ázirlendi
ASTANA. KAZINFORM – Elimizde ǵylymı-ınnovatsııalyq qyzmetke ınvestıtsııalar tartý jónindegi vedomstvoaralyq is-qımyl jospary ázirlendi. Bul týraly Ǵylym jáne joǵary bilim mınıstrliginen málim etti.
- Ǵylym jáne joǵary bilim mınıstrligi Syrtqy ister mınıstrligimen birlesip, ǵylymı-ınnovatsııalyq qyzmetke ınvestıtsııalar tartý jónindegi vedomstvoaralyq is-qımyl josparynyń jobasyn ázirledi. Jospar jobasynda ǵylym men ınnovatsııalarǵa ınvestıtsııa kólemin arttyrýǵa baǵyttalǵan birqatar shara qarastyrylǵan. Oǵan jeke sektor men kásipkerlerdi ǵylymı-ınnovatsııalyq jobalardy qarjylandyrýǵa tartý, ǵylymı-zertteý jáne tájirıbelik-konstrýktorlyq jumystarǵa syrtqy qarjylandyrý kólemin ulǵaıtý, jeke qosalqy qarjylandyrý tetikterin damytý, venchýrlik qorlar qurý, sondaı-aq birlesken zerthanalar men R&D ortalyqtaryn ashý kiredi, - dep atap ótti vedomstvodan agenttiktiń resmı saýalyna oraı.
Qujatta birqatar nysanaly ındıkator belgilengen. Atap aıtqanda, ǵylymı-zertteý jáne tájirıbelik-konstrýktorlyq jumystarǵa tartylatyn syrtqy qarjylandyrý kólemi, jeke qosa qarjylandyrý úlesi, venchýrlik qorlar men birlesken zerthanalar jáne R&D ortalyqtarynyń sany eskerilmek.
- Jospar is-sharalary sheteldik ınvestorlardy tartýǵa, ǵylymı-ınnovatsııalyq qyzmetti venchýrlik qarjylandyrý tetikterin damytýǵa, ınnovatsııalyq ınfraqurylymdy qalyptastyrýǵa, sondaı-aq halyqaralyq ǵylymı-tehnıkalyq yntymaqtastyq pen ǵylymı ázirlemelerdi kommertsııalandyrýdy damytýǵa baǵyttalǵan, - deıdi mınıstrlikten.
Aıta keteıik, Kýrchatov qalasyna ǵylymı qalashyq mártebesin 2027 jyldyń úshinshi toqsanynda berý josparlanǵan.
