Ǵylymdy kommertsııalandyrýdyń ozyq tájirıbeleri: Qazaqstan men Ulybrıtanııa yntymaqtastyq ornatady
LONDON. KAZINFORM – Qazaqstan jáne Ulybrıtanııa ǵylymı ázirlemelerdi kommertsııalandyrý, sondaı-aq ınnovatsııalardy yntalandyrý baǵytynda yntymaqtastyq qurmaq. Londonda qos eldiń ǵylym qorynyń ókilderi kezdesip, áriptestik qurý múmkindikterin qarastyrdy, dep habarlaıdy Kazinform agenttiginiń menshikti tilshisi.
Koroldik ınjenerlik akademııasy janyndaǵy Enterprise Hub kásipkerlik ortalyǵy bıznes jasap, tabys tapqysy keletin ınjenerlerdi qoldaýmen aınalysady. On jyldan astam ýaqyttan beri ol startap ıdeıalardy paıda bolý kezeńinen bastap, naryqqa shyǵý sátine deıin súıemeldep keledi. Sonymen qatar bıznestiń Ulybrıtanııada ǵana emes syrtqy naryqtarǵa da shyǵýyna kómektesedi.
«Búgin biz ǵylymdy kommertsııalandyrý, bilim berý, kásipkerlik jáne ınnovatsııalyq ekojúıeni keńeıtý boıynsha óz tájirıbemizben bólisip jatyrmyz. Qazaqstandaǵy ekojúıe týraly da bilgimiz keledi», - deıdi Koroldik ınjenerlik akademııasy Kásipkerlik ortalyǵynyń dırektory Ana Avalıanı.
«Bul áleýeti zor áriptestik bolǵaly tur. Basqa elderdegi úzdik tájirıbelerdi zerttep, seriktestik qurýǵa qulyqtymyz. Bolashaqta álemdi ózgertetin tehnologııalardy engizip, olardy jetildirý baǵytynda birigip jumys isteımiz degen úmittemiz», - deıdi Changeschool kompanııasynyń damý boıynsha dırektory Nıl Marshall.
Qazaqstandyq Ǵylym qorynyń «Ǵylym jáne tehnologııalyq saıasat» týraly zań aıasynda jańa fýnktsıonalǵa ıe bolǵany belgili. Onyń ishine venchýrlyq qarjylandyrý, akseleratsııa, bıznes-ınkýbatsııa kiredi. Osy jáne basqa da quraldardyń tehnologııalardy kommertsııalandyrý deńgeıin arttyrýǵa kóp kómegi tımek. Ǵylymdy eldiń ındýstrııalyq qajettiligine baǵyttaý úshin halyqaralyq tájirıbege súıený óte mańyzdy, deıdi Ǵylym qoryndaǵylar.
«Ulybrıtanııa – ǵylymdy kommertsııalandyrý boıynsha ozyq elderdiń biri. Onyń tájirıbesin Qazaqstanda engizý josparymyzda bar. Joǵarǵy oqý oryndarynyń tájirıbesi de qyzyqty. Óıtkeni ýnıversıtetterinde akseleratsııalyq baǵdarlamalar men bıznes-ınkýbatorlar damyǵan. Venchýrlyq kapıtalmen de tikeleı jumys isteıdi», - deıdi «Ǵylym qory» AQ Basqarma tóraǵasy Kamıl Aqatov.
Ǵylym qorynyń qyzmetkerleri sondaı-aq salaǵa tikeleı jáne janama qatysy bar birqatar jergilikti mınıstrlikterdiń ókilderimen kezdesip, ózekti máselelerdi talqylady. Ulybrıtanııa ýnıversıtetteri qaýymdastyǵymen basqosý barysynda eki eldiń ǵylymı uıymdary arasyndaǵy áriptestikti damytý máseleleri sóz boldy.
