Ǵylymdy qoldaý: 30 joba eksportqa shyqty
ASTANA. KAZINFORM – Ǵylym jáne joǵary bilim mınıstrliginiń Joǵary jáne joǵary oqý ornynan keıingi bilim komıteti Ǵylymdy kommertsııalandyrýǵa qatysty túsinik berdi.
- Qazirgi tańda granttyq jáne baǵdarlamalyq nysanaly qarjylandyrý aıasynda barlyǵy 2217 ǵylymı joba júzege asyrylyp jatyr. Atap aıtqanda, 2024–2026 jyldarǵa arnalǵan granttyq qarjylandyrý boıynsha 1 077 joba, al baǵdarlamalyq nysanaly qarjylandyrý sheńberinde 30 joba iske asyrylyp keledi. Sonymen qatar, 2025–2027 jyldarǵa arnalǵan granttyq qarjylandyrý boıynsha 1 031 joba jáne baǵdarlamalyq nysanaly qarjylandyrý baǵytynda 79 joba qamtylǵan, - delingen komıtettiń Kazinform agenttigine bergen jaýabynda.
2016 jyldan bastap «Ǵylym qory» AQ ǵylymı nemese ǵylymı-tehnıkalyq qyzmet nátıjelerin kommertsııalandyrý jobalaryn granttyq qarjylandyrý boıynsha konkýrstar ótkizip keledi. Osy kezeńde, ıaǵnı 2016-2025 jyldary jalpy 7 konkýrs uıymdastyryldy.
- Qoldaý kórsetilgen jobalardyń elimizdiń ǵylymı-tehnıkalyq jáne ekonomıkalyq damýyna qosqan jıyntyq úlesi 143,3 mlrd teńgeni qurady. Bul kórsetkish ónimdi satýdan túsken tabysty, tartylǵan jeke qosa qarjylandyrýdy, salyq tólemderin jáne jobalardyń materıaldyq-tehnıkalyq bazasyn nyǵaıtýǵa baǵyttalǵan ınvestıtsııalardy qamtıdy. Atap aıtqanda, ónim satýdan túsken tabys 61,7 mlrd teńgege jetti, 28,2 mlrd teńge jeke qosa qarjylandyrý tartyldy, bıýdjetke 13,2 mlrd teńge salyq tólendi. Sonymen qatar 40,1 mlrd teńgege negizgi quraldar satyp alynyp, 2,5 myńǵa jýyq jumys orny quryldy. Búginde 30 joba eksportqa shyqty, al 8 joba boıynsha ónim satý kólemi 1 mlrd teńgeden asty, - dep atalyp ótken mınıstrlik aqparatynda.
Aıta keteıik, jaqynda Ǵylym jáne joǵary bilim mınıstri Saıasat Nurbek Japonııa men Koreıa Respýblıkasynyń jetekshi ýnıversıtetteri jáne ǵylymı-tehnologııalyq uıymdarynyń basshylarymen birqatar kezdesý ótkizdi.
