Ǵylymdy qarjylandyrý júıesinde memlekettik baqylaý kúsheıtiledi

ASTANA. KAZINFORM — Ǵylym komıtetine ǵylymı jobalardyń zańǵa sáıkestigin baqylaý quzireti beriledi. Bul týraly Májilistiń jalpy otyrysynda «QR-nyń keıbir zańnamalyq aktilerine ǵylym máseleleri boıynsha ózgerister men tolyqtyrýlar engizý týraly» zań jobasyn tanystyrǵan depýtat Ashat Aımaǵambetov aıtty.

— Ǵylymdy qarjylandyrý júıesinde jaýapkershilik pen memlekettik baqylaý kúsheıtiledi. Qazirgi tańda ǵylymı jobalardy qarjylandyrý boıynsha sheshimderdi, qaı joba qansha qarajat alatynyn, qaı joba qoldaý tabatynyn, osynyń bárin Ulttyq ǵylymı keńester sheshedi. Al Ǵylym komıteti qoldanystaǵy zańǵa sáıkes, osy sheshimdi tek buljytpaı oryndaýy kerek. Alaıda, mlrd-taǵan qarjyǵa qatysty ýákiletti organnyń naqty jaýapkershiligi de, baqylaý fýnktsııalary da tolyq aıqyndalmaǵan, — dedi ol.

Depýtattyń aıtýynsha, osyǵan qatysty Joǵary aýdıtorlyq palata da tıisti usynystaryn bergen.

— Endi Ulttyq ǵylymı keńester ǵylymı jobalar boıynsha sheshim qabyldap, Ǵylym komıtetine usynady. Al ýákiletti organ onyń zańǵa sáıkestigin baqylap, ony bekitedi. Memlekettiń qarajaty bar jerde memlekettik jaýapkershilik te bolýy tıis, — dedi Ashat Aımaǵambetov.

Aıta keteıik, ǵalymdarǵa elimizdegi kez kelgen zerthana qoljetimdi bolady.  Ol úshin atalǵan zań jobasy aıasynda zerthanalardy basqa da ǵalymdarǵa qoljetimdi etý maqsatynda «arnaıy ujymdyq paıdalaný zerthanalary» degen uǵym jáne tıisti tetik engiziledi.