Ǵylym jáne joǵary bilim mınıstrliginiń ókilettigi keńeıdi

Qujatqa sáıkes, 13 tamyzdan bastap mınıstrlikke birqatar jańa ókilettik berildi.

Atap aıtqanda, mınıstrlik Qazaqstandaǵy sheteldik joǵary jáne (nemese) joǵary oqý ornynan keıingi bilim berý uıymdary fılıaldarynyń, halyqaralyq jáne sheteldik oqý oryndarynyń qyzmet qaǵıdalary men olardyń yntymaqtastyq nysandaryn ázirlep, bekitedi.

Sondaı-aq Qazaqstan aýmaǵynda bilim berý jáne ǵylymı-zertteý qyzmetin júzege asyratyn sheteldik joǵary jáne (nemese) joǵary oqý ornynan keıingi bilim berý uıymdarynyń fılıaldary men sheteldik oqý oryndaryn taný qaǵıdalaryn ázirlep, bekitý mınıstrliktiń quzyretine berildi.

Budan bólek, vedomstvo densaýlyq saqtaý salasyndaǵy bilim berý uıymdaryna oqýǵa qabyldaý qaǵıdalaryn kelisedi jáne memlekettik qyzmetshilerdiń eńbek tártibi qaǵıdalaryn bekitedi.

Mınıstrlik memlekettik zańdy tulǵalarda basqarý fýnktsııalaryn atqarýǵa baılanysty laýazymdarǵa qoıylatyn biliktilik talaptaryn memlekettik qyzmet isteri jónindegi ýákiletti organmen kelise otyryp bekitedi.

Sonymen qatar sel, kóshkin jáne qar kóshkini qaýipteri men táýekelderiniń ártúrli masshtabtaǵy kartalaryn ázirleý jáne qoldaný qaǵıdalaryn azamattyq qorǵaý salasyndaǵy ýákiletti organmen kelise otyryp ázirlep, bekitedi.

Taǵy bir jańa ókilettik ǵylym qalasyn damytýǵa qatysty. Mınıstrlik tıisti salanyń ýákiletti organymen birlesip, múddeli memlekettik organdarmen jáne tıisti ákimshilik-aýmaqtyq birliktiń jergilikti atqarýshy organymen kelise otyryp, ǵylym qalasyn damytý strategııasyn ázirleıdi jáne kelisedi. Strategııada ǵylym qalasy qyzmetiniń basym ǵylymı baǵyttary qamtylady.

25 tamyzdan bastap mınıstrliktiń ókilettigi taǵy keńeıedi.

Osy kúnnen bastap mınıstrlik ǵylymı-zertteý ınstıtýttarynyń, joǵary jáne (nemese) joǵary oqý ornynan keıingi bilim berý uıymdarynyń, sondaı-aq akkredıttelgen ózge de ǵylymı jáne (nemese) ǵylymı-tehnıkalyq qyzmet sýbektileriniń bıýdjet qarajaty esebinen júrgiziletin ǵylymı zertteýler men ǵylymı jumystarǵa qajetti taýarlardy, jumystar men kórsetiletin qyzmetterdi satyp alý qaǵıdalaryn ázirlep, bekitedi. Bul qaǵıdalar memlekettik satyp alý salasyndaǵy ýákiletti organmen kelisiledi.

Sondaı-aq memlekettik tapsyrys aıasynda satyp alynǵan ǵylymı jabdyqtardy paıdalaný jáne ujymdyq paıdalanýdaǵy ǵylymı zerthanalar men akademııalyq artyqshylyq ortalyqtaryna qol jetkizý qaǵıdalaryn ázirleý jáne bekitý mınıstrlikke júkteledi.

Vedomstvo ǵylym baǵyttary jáne ǵylymı jáne (nemese) ǵylymı-tehnıkalyq qyzmet nátıjelerin kommertsııalandyrý boıynsha ulttyq ǵylymı keńesterdiń tizbesin ázirlep, bekitedi.

Sonymen birge ǵylym jáne ǵylymı-tehnıkalyq qyzmet salasyndaǵy venchýrlik qarjylandyrý qaǵıdalaryn, ǵylymı jáne ǵylymı-tehnıkalyq jobalar men baǵdarlamalarǵa suralatyn qarjylandyrý kóleminiń (qunynyń) ekonomıkalyq negizdiligin baǵalaý ádistemesin ázirlep, bekitedi.

Mınıstrlik ulttyq ǵylymı keńester qaraǵan ǵylymı jáne ǵylymı-tehnıkalyq jobalar men baǵdarlamalardyń iske asyrylýyna júrgizilgen monıtorıng qorytyndylaryn bekitedi.

Budan bólek, ulttyq ǵylymı keńestiń sheshimine sáıkes ǵylymı jáne ǵylymı-tehnıkalyq jobalar men baǵdarlamalardy qarjylandyrý kólemin (qunyn) bekitý de mınıstrliktiń quzyretine kiredi.

Qujatta ǵylym qalasy men ǵylymı-tehnologııalyq parkterdi damytýǵa qatysty birqatar ókilettik te qarastyrylǵan.

Atap aıtqanda, mınıstrlik ǵylym qalasy men ǵylymı-tehnologııalyq parkti damytý strategııasynyń iske asyrylýyna monıtorıng júrgizetin tulǵany aıqyndaıdy. Sondaı-aq osy strategııalardyń iske asyrylýyna monıtorıng júrgizý qaǵıdalaryn ázirlep, bekitedi.

Vedomstvo ǵylym qalasyna qatysýshylardyń tizilimin júrgizý qaǵıdalaryn ázirleıdi jáne bekitedi. Buǵan qosa, múddeli memlekettik organdarmen jáne tıisti ákimshilik-aýmaqtyq birliktiń jergilikti atqarýshy organymen kelise otyryp, ǵylym qalasyna qatysýshylarǵa qoıylatyn talaptardy ázirlep, bekitedi.

Ǵylym qalasyna qatysýshylardy tirkeý qaǵıdalaryn, tirkeý týraly qujatty berý tártibi men onyń nysanyn ázirleý jáne bekitý de mınıstrlikke júkteledi.

Sonymen qatar mınıstrlik tıisti salanyń ýákiletti organymen birlesip, ǵylymı-tehnologııalyq parkti damytý strategııasyn ázirleıdi. Onda parktiń basym ǵylymı baǵyttary qamtylady.

Jańa ókilettikter qatarynda tótenshe jaǵdaılardyń aldyn alý jónindegi talaptardy oryndaý da bar.

Budan bólek, mınıstrlik erte kásibı baǵdarlaý aıasynda tómengi laýazymdarǵa ornalasý úshin daıarlyqtan ótken Qazaqstan azamatynyń oqýyn aıaqtaǵan kúnnen bastap memlekettik qyzmette úsh jyl jumys isteý tártibin memlekettik qyzmet isteri jónindegi ýákiletti organmen kelise otyryp bekitedi.

Sonymen qatar qaýlymen Ǵylym jáne joǵary bilim mınıstrligi apparaty basshysynyń ókilettikteri belgilendi.

Qaýly 13 tamyzdan bastap qoldanysqa engizildi. Qujattyń jekelegen normalary 25 tamyzdan bastap kúshine enedi.

Buǵan deıin Qazaqstannyń Eńbek jáne halyqty áleýmettik qorǵaý mınıstrliginiń ókilettigi keńeıtilgen edi.