Ǵylym jáne joǵary bilim mınıstrligi jalǵan dıplomnyń jolyn kesý úshin biryńǵaı baza qurdy
ASTANA. KAZINFORM – Keıingi ýaqytta ınternet keńistiginde jalǵan dıplomdar týraly túrli aqparat keń taralyp otyr. Osyǵan baılanysty QR Ǵylym jáne joǵary bilim mınıstrligi dıplomdardyń zańsyz aınalymyna tosqaýyl qoıý úshin birqatar naqty shara qabyldady.
Mınıstrliktiń málimetinshe, búginde 1991 jyldan beri berilgen joǵary bilim týraly dıplomdardyń biryńǵaı bazasy jasaqtalǵan. Atalǵan bazaǵa qazirgi tańda 3 mıllıonnan astam derek engizildi. Bul jumys 2018 jyldan beri kezeń-kezeńimen júzege asyrylyp keledi.
– 2021 jyldan bastap barlyq joǵary oqý oryny (azamattyq emes jáne medıtsınalyq JOO-lardy qospaǵanda) bilim týraly zańnamaǵa sáıkes ózindik úlgidegi dıplomdardy berip jatyr. Olardyń túpnusqalyǵyn Joǵary bilim berýdiń biryńǵaı platformasy – EPVO arqyly tekserýge bolady, - dedi Ǵylym jáne joǵary bilim mınıstrligine qarasty Joǵary jáne joǵary oqý ornynan keıingi bilim komıtetiniń tóraǵasy Gúlzat Kóbenova.
Komıtet basshysynyń aıtýynsha, mınıstrlik ózindik úlgidegi dıplomdardyń mazmunyna qoıylatyn negizgi talaptardy, sondaı-aq dıplom serııasyn bekitedi. Dıplom nómiri men QR-kody arnaıy modýl arqyly EPVO júıesinde generatsııalanady. Bul qyzmetke tek sol júıede tirkelgen, jaýapty retinde taǵaıyndalǵan JOO qyzmetkerlerine ǵana qoljetimdi.
– Eger EPVO júıesinde bilim alýshy týraly málimet bolmasa, dıplom nómirin generatsııalaý múmkin emes. Generatsııalanǵan nómiri men QR-kody joq dıplomdar jaramsyz bolyp esepteledi, - dedi Gúlzat Kóbenova.
Sonymen qatar EPVO júıesinde jumys berýshilerge arnalǵan arnaıy modýl iske qosylǵan. Onyń kómegimen kez kelgen jumys berýshi ózindik úlgidegi dıplomdardy, sondaı-aq burynǵy memlekettik úlgidegi dıplomdardyń túpnusqalyǵyn teksere alady.
Mınıstrlik ókili jalǵan dıplomdardy daıyndaý jáne satý faktilerin anyqtaý boıynsha Mádenıet jáne aqparat mınıstrligimen, sondaı-aq Іshki ister mınıstrligimen birlesip turaqty negizde jumys júrgizilip jatqanyn atap ótti.
– Jalǵan qujat jasaǵany úshin zańnamada 2 000 aılyq eseptik kórsetkishke deıin aıyppul ne 2 jylǵa deıin bas bostandyǵynan shekteý nemese aıyrý jazasy kózdelgen. Al jalǵan qujatty paıdalanǵandar 160 AEK mólsherinde aıyppul tóleıdi nemese 40 táýlikke deıin ákimshilik qamaqqa alynady, - dedi komıtet tóraǵasy.
Aıta keteıik, bıyl oqý jylynda elimizge 31 500 sheteldik stýdent kelgenin jazǵanbyz.