Ǵylym jáne joǵary bilim mınıstri UBT-dan 140 ball jınaǵan túlekpen kezdesti
ASTANA. KAZINFORM — Búgin Qazaqstan Respýblıkasy Ǵylym jáne joǵary bilim mınıstri Saıasat Nurbek 2026 jylǵy negizgi UBT-da eń joǵary 140 ball jınaǵan túlek Áset Altaırmen kezdesti.
Kezdesý barysynda mınıstr talapkerdi joǵary nátıjesimen quttyqtap, bul jetistik qajyrly eńbek pen júıeli daıyndyqtyń, bilimge degen umtylystyń nátıjesi ekenin atap ótti.
— Bul jetistik — tabandylyqtyń, maqsatqa adaldyqtyń jáne úzdiksiz eńbektiń jemisi. Seniń nátıjeń myńdaǵan talapkerge úlgi bolady dep senemin. Aldaǵy stýdenttik ómirińe sáttilik, tańdaǵan mamandyǵyńda bıik belesterdi baǵyndyryp, elińniń damýyna úles qosa berýińe tilektespin, — dedi mınıstr.
Kezdesýge Ásetti qoldaý úshin onyń ata-anasy da qatysty. Mınıstr olarǵa balasynyń bilim alýyna jaǵdaı jasap, árdaıym qoldaý kórsetkeni úshin alǵys bildirip, talapkerdiń jetistiginde otbasynyń tárbıesi men qamqorlyǵynyń orny erekshe ekenin atap ótti.
Áset Altaır UBT-ǵa daıyndyq tájirıbesimen bólisip, bolashaq mamandyǵyn tańdaý týraly aıtyp berdi.
Eske sala keteıik, Pavlodar qalasyndaǵy № 7 jalpy orta bilim berý mektebiniń túlegi Áset Altaır 2026 jylǵy negizgi UBT-da «Matematıka — Geografııa» pánder kombınatsııasyn tańdap, alǵashqy múmkindiginde 140 ball jınady. Sonymen qatar ol «Úzdik attestat» ıegeri.
Aıta ketelik UBT-nyń jańa formatyn engizý 2027 jyly pedagogıkalyq baǵyttan bastalady.
