Ǵylym jáne bilim salasyna jemqorlyq táýekeli boıynsha júrgizlgen taldaý birqatar olqylyqtardy anyqtady
ASTANA. KAZINFORM - Memleket basshysynyń bilim jáne ǵylym salasynda ashyqtyq pen zańdylyqty qamtamasyz etý jónindegi tapsyrmalaryn oryndaý sheńberinde Memlekettik qyzmet isteri agenttigi atalǵan salanyń, sonyń ishinde onyń qarjylandyrý aspektileriniń syrtqy sybaılas jemqorlyq táýekelderine taldaý júrgizdi.
Taldaý ǵylymı jobalardy tańdaý jáne iske asyrý barysynda júıelik olqylyqtardy anyqtady.
-13,5 myń sarapshynyń shamamen 75%-y is júzinde jumysqa qatyspaǵany belgili boldy. Ekspertızany formaldy júrgizý jáne nátıjelerdi belgili bir úmitkerlerge qaraı túzetý jaǵdaılary tirkeldi. 30 zertteý boıynsha obektıvtilik prıntsıpteriniń buzylýy anyqtalyp, olardyń jalpy quny 11,5 mlrd teńgeni qurady. Taldaý nátıjesinde 100-den astam usynys engizildi, - delingen habarlamada.
Sondaı-aq onda 2025 jyldyń shilde-jeltoqsan aralyǵynda Agenttik profıldi mınıstrliktermen birlesip olardyń iske asyrylýyna jan-jaqty sharalar qabyldaǵany aıtylǵan.
Sarapshy qyzmetiniń qunyn esepteý boıynsha jańa ádisteme bekitildi. Eńbekaqydaǵy teńsizdik joıyldy, buǵan deıin sheteldik mamandarǵa shamamen 400 myń teńge tólense, otandyq sarapshylar orta eseppen 8 500 teńge alǵan. Eńbekaqy tóleýge biryńǵaı tásil engizildi, ol teń jaǵdaılardy qamtamasyz etedi jáne Ulttyq saraptamalyq áleýetti nyǵaıtady.
Ǵylymı ádep talaptaryn buzǵan nemese josparlanǵan nátıjelerge qol jetkizýdi qamtamasyz etpegen adal emes sarapshylar men jobalar basshylarynyń reestri quryldy. Reestrge engizý qatysýshylardyń naqty jetistikteri rastalǵanǵa deıin konkýrstarǵa qatysý múmkindigin ýaqytsha shekteýdi bildiredi, bul personaldy jaýapkershilikti arttyryp, bıýdjetti resmı ıgerýdi boldyrmaıdy.
Ǵylymı jobalardyń iske asyrylýy men qarajattyń jumsalýy týraly aqparat resmı resýrstarda ashyq qoljetimdilikte ornalastyrylady.
Taldaý qorytyndysy boıynsha oqýshylardy jalǵan esepke alý táýekelderi 2 966 mektepte anyqtaldy. Qazirgi tańda 2 962 mektepke (99,9%) tsıfrlyq baqylaý júıeleri engizilgen, bul naqty oqýshylar joq mektepterge qarjylandyrý múmkindigin joıady.
Ulttyq memlekettik ǵylymı-tehnıkalyq saraptama ortalyǵynda jarııalanymdar men granttyq jobalardyń nátıjelerin avtomattandyrylǵan esepke alý úshin tsıfrlyq sheshimder engizildi. Qatysýshylardyń derekteri shıfrlanyp, múddeler qaqtyǵysynyń aldyn alý qamtamasyz etildi.
Sarapshylardy kezdeısoq tańdaý ádisi men jasandy ıntellekt elementterin qoldanatyn avtomatty irikteý mehanızmi engizildi.
- Atalǵan sharalar 2026 jylǵa josparlanǵan 270 mlrd teńgeden astam bıýdjet qarajatynyń maqsatty jumsalýyn qamtamasyz etip, basqarýdyń ashyq júıesin qalyptastyrady. Agenttik bilim jáne ǵylym salasynda zańdylyq pen adaldyqty qamtamasyz etý boıynsha júıeli jumystaryn jalǵastyra beredi, - delingen habarlamada.
Osyǵan deıin ǵylymdy qarjylandyrý júıesinde memlekettik baqylaý kúsheıtiletini týraly jazdyq.